کراچی اسٹاک ایکسچینج تین سال سے دنیا کی دس بہترین پر فارمنگ مارکیٹس میں شمار کی جارہی ہے، ماہرین

کراچی (اُردو پوائنٹ اخبار تازہ ترین۔ 24اپریل۔2015ء) عوامی جمہوریہ چین کے صدر کی پاکستان آمد اور اس کے نتیجے میں دستخط ہونے والی مفاہمت کی یاداشتوں کی بنا پر شیئرز مارکیٹ پر مثبت اثرات مرتب ہونے کی توقع ہے کیونکہ موجودہ حکومت کی جانب سے انویسٹمنٹ فرینڈلی ماحول کی حوصلہ افزائی اور اسٹاک ایکسچینج میں نئی کمپنیوں کی شمولیت کی اجازت کے بعد پاکستان کی شیئر مارکیٹ اس وقت اپنی تاریخ کی بلند ترین سطح پر ہے اور اب عوام بنکوں کے شرح منافع میں کمی کے نتیجے میں اسٹاک مارکیٹ میں سرمایہ کاری کی جانب زیادہ راغب ہو رہے ہیں۔

ان خیالات کا اظہار اسٹاک مارکیٹ کے ماہرین نے محمد علی جناح یونیورسٹی کراچی کی بزنس ایڈمنسٹریشن سیمینار سوسائیٹی کے زیر اہتمام "کراچی اسٹاک ایکسچینج کا موجودہ رحجان "کے موضوع پرہونے والے سیمینار سے خطاب کرتے ہوئے کیا۔

(جاری ہے)

سیمینار سے اے کے ڈی سیکورٹی کے سی ای او محمد فرید عالم،عارف حبیب گروپ کے نائب صدر افتخار حسین اور محمد علی جناح یونیورسٹی کے صدر ڈاکٹر عبدالوہاب نے خطاب کیا۔

سیمینار سے اپنے خطاب میں محمد فرید عالم نے کہا کہ کراچی اسٹاک ایکسچینج تین سال سے دنیا کی دس بہترین پر فارمنگ مارکیٹس میں شامل ہے جس کی مارکیٹ کیپٹلائزیشن77 بلین ڈالر زہے، گزشتہ تین برس میں ہماری اسٹاک مارکیٹ میں اضافہ کی شرح 49 فی صد رہی ہے۔ انہوں نے کہا کہ پاکستانی کمپنیاں دنیا بھر میں اس وقت سب سے زیادہ منافع دے رہی ہیں جن کی تعداد 500 کے قریب ہے۔

انہوں نے لوگوں کو مشورہ دیا کہ اسٹاک مارکیٹ میں سرمایہ کاری بہت سوچ سمجھ کر کرنی چاہیے اور اس کے لئے اپنے روئیہ میں لچک پیدا کرنے کی ضرورت ہے،جلد بازی میں فیصلے کرنے کے بجائے لمبی مدت کی منصوبہ بندی کی جائے تاکہ آپ کا سرمایہ محفوظ رہے اور منافع بھی حاصل کیا جا سکے۔انہوں نے کہا کہ پاکستان کا سروس سیکٹر جی ڈی پی میں 27,153 بلین ڈالرز ایکویٹی فنڈز فراہم کرتا ہے اور یہ ہمارا سروس سیکٹر ہی ہے جس کی کارکردگی کی بنا پر غیر ملکی سرمایہ کار پاکستان میں سرمایہ کاری پر متوجہ ہوتے ہیں۔

اسٹاک مارکیٹ ایکسپرٹ افتخار حسین نے کہا کہ پاکستان کی اسٹاک مارکیٹ سات برس سے مسلسل اوپر کا جانب جارہی ہے اور شئیر ہولڈرز کو بہت اچھا منافع دیا جارہا ہے ،25 سے 30 کمپنیاں ایسی ہیں جو مسلسل منافع دے رہی ہیں۔انہوں نے کہا کہ ہماری اسٹاک مارکیٹ میں بھیڑ چال کا ماحول پایا جاتا ہے، بہت سارے لوگ بروکرز کو اپنے شئیرز کی خرید و فروخت کا اختیار دے دیتے ہیں جو غلط بات ہے جس کی بنا پر ان کو نقصان بھی اٹھانا پڑتا ہے اس لئے ان کو چاہیے کہ اپنے سرمائے کے تحفظ کے لئے تھوڑی سی فیس دے کر سرمایہ کاری کے مشیر سے مشورہ کرلیا جائے تاکہ انکی سرمایہ کاری محفوظ رہے۔

انہوں نے کہا میڈیا چھو ٹے سرمایہ کاروں کے نقصانات کو تو بڑھا چڑھا کر پیش کرتا ہے لیکن جب وہ بہت زیادہ منافع حاصل کرتے ہیں تو اسے اجاگر نہیں کیا جاتا ہے۔انہوں نے بتا یا کہ کراچی اسٹاک ایکسچینج 1947 میں 100 ملین کے سرمائے سے قائم کیا گیا تھا تو اس وقت رجسٹرڈ کمپنیوں کی تعداد صرف پانچ تھی مگر اب یہاں 561 کمپنیاں رجسٹرڈ ہیں اوراس کی سرمایہ کاری کا حجم 1181 بلین روپے سے زائد ہے۔

محمد علی یونیورسٹی کے صدر ڈاکٹر عبدالوہاب نے کہا کہ ان کو اسٹاک مارکیٹ کا 55 سال کا تجربہ ہے ، ان کا طریق کار یہ ہے کہ جن کمپنیوں کے شئیرز کی قیمت جب بہت گرجاتی ہے تو وہ شئیرز خرید لیتے ہیں پھر ہوتا یہ ہے کہ کچھ عرصہ کے بعد جب ان کمپنیوں کے حالات بہتر ہونا شروع ہوتے ہیں تو ان کے شئیرز کی قیمت بھی بڑھ جاتی ہے اور یوں اپنی سرمایہ کاری پر اچھا خاصا منافع ملنے لگتا ہے۔انہوں نے طلباء پر زور دیا کہ اگر وہ اسٹاک مارکیٹ میں سرمایہ کاری میں دلچسپی رکھتے ہیں تو ان کو چاہیے کہ وہ کمپنیوں کی سالانہ رپورٹ کا ضرور مطالعہ کیا کریں۔