پن بجلی توانائی بحران کے خاتمہ اور سستی بجلی کے حصول کا آسان ذریعہ ہے ‘افتخار بشیر

جمعہ 8 مئی 2015 16:57

لاہور ( اُردو پوائنٹ اخبار تازہ ترین۔ 08 مئی۔2015ء) تاجر رہنما و صدر گرائنڈنگ ملز ایسوسی ایشن پاکستان چوہدری افتخار بشیر سابق ایگزیکٹو ممبر لاہور چیمبرآف کامرس نے صنعتی اداروں میں بجلی کی لوڈشیڈنگ کے پر تشویش کا اظہار کرتے ہوئے کہا کہ لوڈشیڈنگ کے باعث صنعتی ادارے بحران کا شکار ہیں ۔اس لیے بجلی بحران کے خاتمہ کیلئے تمام دستیاب وسائل استعمال میں لائے جائیں اور سستی بجلی کے حصول اور لوڈ شیڈنگ کے خاتمہ کے لیے کالا باغ،دیامر،بھاشا،مہمند،اکھوڑی، بونجی،کرم تنگی،منڈا،داسوڈیم منصوبے شروع کیے جائیں،پن بجلی توانائی بحران کے خاتمہ اور سستی بجلی کے حصول کا آسان ذریعہ ہے ،مہنگی بجلی سے صنعتکاروں کے ساتھ ساتھ عوام بھی پریشانی کا شکار ہیں ،اب مزید بجلی کی قیمتوں میں 4روپے اضافہ کی خبروں سے سرمایہ کار پریشانی کا شکار ہیں۔

(جاری ہے)

ان خیالات کا اظہار انہوں نے گرائنڈنگ ملز ایسوسی ایشن کے عہدیداران کے ایک اجلاس سے خطاب کرتے ہوئے کیا۔ چوہدری افتخار بشیر نے کہا کہ کالا باغ ڈیم تعمیر نہ ہونے کی وجہ سے ملک میں سالانہ اربوں روپے کا نقصان ہورہا ہے چھوٹے ڈیم بنا کر پانی اور توانائی کے بحران کو کسی حد تک کم کیا جاسکتا ہے لیکن توانائی بحران کے خاتمہ کیلئے کالا باغ ڈیم کی تعمیر ناگزیر ہے ، کالاباغ ڈیم کا منصوبہ سستی ترین بجلی کے حصول اور زراعت کی ترقی کا باعث بنے گا۔

پاکستان کا مستقبل زراعت کی ترقی سے وابستہ ہے جب زراعت ترقی کرے گی تو صنعت کو وافر خام مال مہیا ہوگا اور چمنیوں سے نکلنا شروع ہوجائے گا ۔6.1ملین فٹ پانی کا ذخیرہ کرنے والے کالا باغ ڈیم کی تعمیر سے ملک میں صنعتی ترقی کے ایک نئے دور کا آغاز ہوگا۔۔انہوں نے کہا کالا باغ ڈیم کی تعمیر ہی ملک کو دوبارہ اندھیروں سے روشینوں کی طرف گامزن کرسکتی ہے کالا باغ کی تعمیر پر اتفاق رائے پیدا کرنے کی کوششیں کی جائیں۔ اعتراضات کا جواب دیا جا چکا ہے،ثابت ہو گیا کہ محالف عناصر دلیل سے خالی ہیں،ڈیم بنے سے نہ کوئی علاقہ ڈوبے گااور نہ کوئی صوبہ اپنے پانی سے محروم ہو گا۔