سندھ حکومت 11 لاکھ میٹرک ٹن گندم خرید رہی ہے،6 کروڑ باردانہ میں سے محکمہ خوراک 1 کروڑ 10 لاکھ باردانہ چھوٹے اور عام کاشتکاروں کو فراہم کررہا ہے،صوبائی وزیر خوراک سید ناصر حسین شاہ

کراچی(اُردو پوائنٹ اخبارتازہ ترین - آئی این پی۔22 اپریل۔2016ء) سندھ کے وزیر خوراک سید ناصر حسین شاہ نے کہا ہے کہ صوبے بھر کی 60 لاکھ میٹرک ٹن گندم کی پیداوار کے مقابلے اس سال سندھ حکومت 11 لاکھ میٹرک ٹن گندم خرید رہی ہے اور باقی مانندہ گندم کی عام مارکیٹ میں قیمت اس وقت بھی 1150 سے 1200 روپے میٹرک ٹن ہے، 6 کروڑ باردانہ میں سے محکمہ خوراک 1 کروڑ 10 لاکھ باردانہ چھوٹے اور عام کاشتکاروں کو فراہم کررہا ہے اور اس پر شکایات پر 6 ڈسٹرکٹ فوڈ انسپکٹرز اور درجنوں سینٹرز آفیسرز کو معطل کردیا گیا ہے۔

رواں سال گذشتہ سال کے مقابلے 60 زائد سینٹرز قائم کئے گئے ہے اور ان کی تعداد اس سال 450 ہے۔ سینٹرز پر باردانہ کی چھوٹے اور عام کاشتکاروں کو نہ ملنے کی شکایات پر کئی سینٹرز سے ادائیگیاں بھی رکوا دی ہیں اور اس کی مکمل تحقیقات کرائی جائے گی۔

(جاری ہے)

اگر حکومت گندم کی خریداری نہ کرتی تو عام مارکیٹ میں اس کی قیمت میں جو استحکام ہے وہ نہ رہتا اور اس کا بڑا نقصان کاشتکاروں اور زمینداروں کو بھگتنا پڑ جاتا۔

پارٹی کے چیئرمین بلاول بھٹو زرداری کی خصوصی ہدایات پر تمام اضلاع کا خود دورہ کررہا ہوں اور جن جن سینٹرز پر شکایات موصول ہورہی ہیں وہاں کا ریکارڈ بھی چیک کررہا ہوں۔ ان خیالات کا اظہار انہوں نے جمعہ کو سندھ اسمبلی میں صحافیوں سے بات چیت کرتے ہوئے کیا۔ سید ناصر حسین شاہ نے کہا کہ 6 کروڑ میں سے سندھ حکومت کی جانب سے 1 کروڑ باردانہ کی فراہمی کے باعث مسائل تو رہیں گے لیکن سندھ حکومت پورے صوبے میں پیدا ہونے والی 60 لاکھ میٹرک ٹن گندم نہیں خرید سکتی۔

انہوں نے کہا کہ اس سال چھوٹے اور عام کاشتکاروں سے ہی گندم کی خریداری کا حدف پورا کیا جارہا ہے اور اس حوالے سے کئی اضلاع میں شکایات پر ڈسٹرکٹ ٹھٹھہ، دادو، شکارپور، جیکب آباد، کشمور اور کندھکوٹ کے ڈسٹرکٹ فوڈ انسپکٹرز کو فوری طور پر معطل کردیا گیا ہے جبکہ دیگر درجنوں سینٹرز پر افسران کی جانب سے چھوٹے اور عام کاشتکاروں کی بجائے بڑے بڑے زمینداروں اور بااثر افراد کو باردانہ فراہم کئے جانے کی شکایات پر نہ صرف ان افسران کو معطل کردیا گیا ہے بلکہ وہاں کی خریدی گئی گندم کی ادائیگیاں بھی رکوا دی گئی ہیں اور اس سلسلے میں تحقیقات کی جارہی ہے کہ یہ گندم چھوٹے اور عام کاشتکاروں سے خریدی گئی ہے یا پھر اس میں کوئی کرپشن ہوئی ہے۔

ایک سوال کے جواب میں سید ناصر حسین شاہ نے کہا کہ اگر سندھ حکومت 11 لاکھ میٹرک ٹن گندم 1300 روپے فی ٹن کے حساب سے نہ خرید کرتی تو آج اس کی مارکیٹ میں جو قیمت ہے اس سے کئی گنا کم قیمت پر کاشتکاروں کو فروخت کرنا پڑتی۔ انہوں نے کہا کہ اس سال حکومت کی جانب سے چاول کی خریداری نہ کرنے پر آج اس کی مارکیٹ میں قیمت نصف سے بھی کم ہے اور اس کے باعث کاشتکاروں اور زمینداروں کو بھاری نقصان اٹھانا پڑرہا ہے۔

ایک اور سوال کے جواب میں صوبائی وزیر خوراک سید ناصر حسین شاہ نے کہا کہ کاشتکاروں کی سہولت کے لئے اس سال 60 سینٹرز گذشتہ سال کے مقابلے زیادہ کھولے گئے ہیں اور ان کی تعداد 390 سے بڑھا کر 450 کردی گئی ہے۔ انہوں نے کہا کہ وہ ہفتہ کو پھر اندرون سندھ کے مختلف اضلاع کا دورہ کریں گے اور دو روز تک وہ مختلف ڈسٹرکٹ میں قائم سینٹرز پر بھی جائیں گے اور وہاں چھوٹے اور عام کاشتکاروں سے بھی ملیں گے۔