کراچی چیمبر آف کامرس اینڈ انڈسٹری نے مالی سال2016-17ء کے وفاقی بجٹ کو سو فیصد سیاسی بجٹ قرار دیا

کراچی(اُردو پوائنٹ اخبارتازہ ترین - این این آئی۔03 جون۔2016ء) کراچی چیمبر آف کامرس اینڈ انڈسٹری نے مالی سال2016-17ء کے وفاقی بجٹ کو سو فیصد سیاسی بجٹ قرار دیا ہے اور کہا کہ نئے مالی سال کا بجٹ موجودہ حکومت کے گذشتہ 3بجٹ میں سے سب سے بدترین بجٹ ہے ، بجٹ کے ذریعے عوام پر ان ڈائریکٹ ٹیکس لگایا گیا ایگر کلچر بجٹ دیکر 18کروڑ عوام کی حق تلفی کی گئی ،آئندہ مالی سال کے بجٹ میں زراعت کے شعبے کو چھوٹ دی گئی جبکہ کماؤ پوت شعبے ( انڈسٹریز) پر ٹیکسز لگائے گئے ،ایسا محسوس ہوتا ہے کہ جیسے 2018کے عام انتخابات کو مد نظر رکھتے ہوئے بجٹ تیار کیا ہو کیونکہ ایوان میں موجود افراد کی بڑی تعداد زراعت کے شعبے سے وابستہ ہے اس لئے انڈسٹریز کو نظر انداز کر کے زراعت کو ترجیح دی گئی لیکن اس کا مطلب یہ ہرگز نہیں کہ زراعت کے شعبے کو دی جانیوالی سہولیات سے نالاں ہیں ،مگر انڈسٹریز کو اہمیت نہ دینے پر افسوس بھی ہے ۔

(جاری ہے)

جمعہ کو کراچی چیمبر آف کامرس اینڈ انڈسٹری میں وفاقی بجٹ پر اپنے رد عمل کا اظہار کرتے ہوئے بزنس مین گروپ کے سربراہ سراج قاسم تیلی ،کے سی سی آٗی کے صدر یونس محمد بشیر ،بی ایم جی کے نائب صدر ہارون فاروقی ،اے کیو خلیل ،ہارون اگر ،شمیم احمد فرپو ،طاہر خالد ،افتخار احمد وہرہ ،چیمبر کے سینئر نائب صدر ضیاء احمد خان نے کہا کہ دنیا میں یہ پریکٹس رہی ہے کہ کرپشن کم کرنے کیلئے ٹیکس ریٹ کو کم کیا جاتا ہے لیکن پاکستان میں ٹیکس کی شرح بڑھا کر ٹیکس چوری کی ترغیب دی جا رہی ہے ،کراچی چیمبر کایہ بھی کہنا تھا کہ حکومت کا یہ کہنا غلط ہے کہ بہتری نظر آ رہی ہے کیونکہ غریب اور عام آدمی خوشحال نظر نہیں آ رہا ۔

بزنس مین گروپ کے سربراہ اور کراچی چیمبر کے سابق صدر سراج قاسم تیلی نے کہا کہ بجٹ میں نئے ٹیکس پیئرز کی کوئی بات نہیں کی گئی جس کا حکومت اور ایف بی آر ہمیشہ سے رونا روتی ہے ، انڈسٹریز پرٹیکسز کو برقرار رکھا گیا یا لفظوں کی جادو گری کے ذریعے اس طرح بجٹ پیش کیا گیا تاکہ اسے بزنس فرینڈلی دیکھایا جا سکے ۔انہوں نے کہا کہ اسحاق ڈار نے ہمیشہ حالات کو پیش نظر رکھ کر بجٹ پیش کیا ایوان میں زراعت والے لوگ بیٹھے ہیں اس لئے انہیں سہولت دیدی گئی لیکن ہم یہ کہتے ہیں کہ زراعت کے شعبے کو سہولت موجودہ حکومت کو اپنے پہلے بجٹ سے ہی دینا چاہئے تھا ۔

انہوں نے کہا کہ بجٹ تقریر سے ظاہر ہوتا ہے کہ عوام پر ان ڈائریکٹ ٹیکس لگایا گیا۔ ایگر کلچر بجٹ دیکر 18کروڑ عوام کی حق تلفی کی گئی کیونکہ آج تک پیش ہونیوالے بجٹ میں ایوان میں کسی نے بھی یہ بات برملا نہیں کہی کہ ایسا بجٹ دیں گے کہ بجٹ سے زراعت والے خوش ہو جائیں گے اور میں یہ بھی جانتا ہوں کہ ایوان میں فیوڈل لارڈ( جاگیردار )بھی موجود ہیں ۔

انہوں نے مزید کہا کہ بزنس کمیونٹی تنگ رہی ہے پہلے کراچی والے تنگ تھے آج پنجاب والے بھی تنگ ہیں ،گذشتہ تین سالوں میں پیش کئے جانیوالے بجٹ میں یہ بجٹ انتہائی خراب بجٹ ہے ۔انہوں نے کہا کہ نئے بجٹ میں کم از کم تنخواہ13ہزار روپے سے بڑھا کر14ہزار روپے کر دی گئی لیکن آج بھی اس تنخواہ پر4افراد پر مشتمل خاندان کا گزارہ نہیں ہو سکتا بدقسمتی یہ ہے کہ جب بھی تنخواہ بڑھائی گئی مہنگائی اس سے کہیں زیادہ بڑھ جاتی ہے جس سے عوام اس ثمرات سے محروم رہ جاتے ہیں ۔

انہوں نے کہا کہ کراچی چیمبر بجٹ پر اپنا حقیقی ردعمل پیر کے روز پریس کانفرنس کے ذریعے دے گی ۔اس موقع پر کراچی چیمبر آف کامرس اینڈ انڈسٹری کے صدر یونس محمد بشیر کا کہنا تھا کہ صنعتکار طبقہ کی ایوان میں نمائندگی نہیں اس لئے اس طرز پر بجٹ کی توقع کی جا سکتی ہے ہم اس بجٹ کو سیاسی اور عوام دشمن بجٹ سمجھتے ہیں حکومت نے کاروباری لاگت کم کرنے کیلئے کوئی واضع اقدامات کا اعلان نہیں کیا اگر یہی صورتحال رہی اور صنعتکار اب بھی نہ جاگیں تو بزنس طبقے کیلئے خطرات آئندہ سالوں میں مزید بڑھ جائیں گے ۔

انہوں نے کہا کہ حکومت نے جو بجٹ پیش کیا ہے اس کے اہداف منی بجٹ کے ذریعے پورے کئے جائیں گے کیونکہ عقل اس بجٹ کو تسلیم کرنے کو تیار ہی نہیں ہے ۔انہوں نے کہا کہ ایوان میں موجود لوگ بزنس کمیونٹی پر رحم کریں اس موقع پر ہارون فاروقی نے کہا کہ مقررہ وقت پر بجٹ پیش کر کے صرف قانونی ضروریات کو پورا کیا گیا اس بجٹ کو ہم بجٹ نہیں سمجھتے بلکہ ایک شعبے کو براہ راست مراعات دینے سے تعبیر کرتے ہیں ۔معرات دینے کے باوجود حکومت اپنے اہداف پورے نہیں کر سکے گی اور چند ماہ بعد ہی منی بجٹ کا سامنا کرنا پڑیگا ۔اے کیو خلیل نے کہا کہ معیشت کو درپیش چیلنجز اب کھل کر سامنے آئیں گے ٹیکس نہ دینے والا زیادہ فائدہ اٹھا رہا ہے جبک ٹیکس دینے والے شعبے کو کوئی مراعات نہیں دی گئی ۔