پاکستان کے ابھرتی مارکیٹوں کی فہرست میں دوبارہ شمولیت کا خیر مقدم کرتے ہیں، عاطف اکرام شیخ

اسلام آباد (اُردو پوائنٹ اخبارتازہ ترین - آئی این پی۔16 جون۔2016ء) تاجر برادری نے اسلام آباد چیمبر آف کامرس اینڈ انڈسٹری میں منعقدہ ایک اجلاس میں پاکستان کا ابھرتی مارکیٹوں کی فہرست میں دوبارہ شمولیت کا خیرمقدم کرتے ہوئے کہا کہ یہ ایک انتہائی مثبت پیش رفت ہے کیونکہ اس سے غیر ملکی سرمایہ کاروں میں پاکستان کی معیشت پر اعتماد بڑھے گا اور وہ زیادہ دلچسپی سے پاکستان کی سٹاک مارکیٹ میں سرمایہ کاری کرنے پر غور کریں گے۔

انہوں نے کہا کہ پاکستان سٹاک ایکس چینج کا مورگن سٹینلی کیپٹل انٹرنیشنل انڈیکس کی ابھرتی مارکیٹوں کی فہرست میں دوبارہ شامل ہونا اس بات کا ثبوت ہے کہ ہماری سٹاک مارکیٹ بہتر کارکردگی کا مظاہرہ کر رہی ہے اور معیشت بحالی کی طرف گامزن ہے۔ اجلاس سے خطاب کرتے ہوئے اسلام آباد چیمبر آف کامرس اینڈ انڈسٹری کے صدر عاطف اکرام شیخ نے کہا کہ پاکستان کا ابھرتی مارکیٹوں کی فہرست میں دوبارہ شمولیت سے ہماری کیپٹل مارکیٹ کی سرگرمیوں میں مزید تیزی آئے گی اور سٹاک مارکیٹ میں غیر ملکی سرمایہ کاری میں بھی اضافہ ہو گا۔

(جاری ہے)

انہوں نے کہا کہ پاکستان کا ابھرتی مارکیٹوں کی فہرست میں شمولیت اس بات کا عکاس ہے کہ ہماری کیپٹل مارکیٹ اس وقت دنیا کی چند بہترین کارکردگی کا مظاہرہ کرنے والی مارکیٹوں میں شامل ہے۔ انہوں نے کہا کہ ایم ایس سی آئی ابھرتی مارکیٹوں کا انڈیکس ترقی پذید ممالک میں سرمایہ کاروں کی طرف سے سب سے زیادہ استعمال ہونے والا انڈیکس ہے اور پاکستان کا اس انڈیکس میں شمولیت سے ہماری سٹاک مارکیٹ مزید مضبوط ہو گی۔

انہوں نے کہا کہ اس پیش رفت سے کیپٹل مارکیٹ کے ذریعے پیداواری شعبوں میں سرمایہ کاری میں بھی اضافہ ہو گا کیونکہ سٹاک مارکیٹ پر درج ہونے والی کمپنیاں مشینری و پلانٹس میں سرمایہ کاری کرنے کیلئے مارکیٹ سے فنڈز اکھٹا کرتی ہیں۔ انہوں نے کہا کہ مارکیٹ سے نجی شعبے کو سرمایہ کاری کی بہتر سہولت حاصل ہونے سے نہ صرف کاروبار کو بہتر فروغ ملے گا بلکہ اس سے روزگار کے نئے مواقع پیدا ہوں گے اور عام آدمی کیلئے سٹاک مارکیٹ میں سرمایہ کاری کے بہتر مواقع حاصل ہوں گے۔

انہوں نے کہا کہ ان تمام سرگرمیوں میں بہتری آنے سے ملک کیلئے پائیدار اقتصادی ترقی حاصل کرنے کی راہ ہموار ہو گی۔تاجر برادری نے کہا کہ کیپٹل مارکیٹ کی بہتر ترقی کیلئے سرمایہ کاروں کا تحفظ یقینی بنانا بہت ضروری ہے لہذا نہوں نے حکومت پر زور دیا کہ وہ مارکیٹ میں سرمایہ کاری کرنے والے سرمایہ کاروں کے بہتر تحفظ کیلئے جامع اقدامات اٹھائے۔

انہوں نے کہا کہ حکومت ایسے قوانین بنائے جن کے ذریعے مارکیٹ میں سرمایہ کاری کرنے والے سرمایہ کاروں کے مفادات کا بہتر تحفظ ہواور سٹاک مارکیٹ کی تمام سرگرمیاں صاف و شفاف طریقے سے آگے بڑھیں ۔ انہوں نے کہا کہ سٹاک مارکیٹ میں سرمایہ لگانے والوں کا مفادات کا بہتر تحفظ کر کے اور مارکیٹ میں شفافیت کے کلچر کو فروغ دے کر نہ صرف کیپٹل مارکیٹ کی پائیدار ترقی کیلئے سازگار حالات پیدا ہوں گے بلکہ ایک بہتر ترقی کرتی ہوئی سٹاک مارکیٹ ملک کی اقتصادی ترقی میں بھی فعال کردار ادا کرے گی۔ لہذا حکومت ان مقاصد کے حصول کیلئے تمام ممکنہ اقدامات اٹھائے۔