گزشتہ ہفتے پاکستان اسٹاک مارکیٹ بلندیوں کی نئی سطح پرپہنچ گئی

کراچی(اُردو پوائنٹ اخبارتازہ ترین - آن لائن۔18 جون ۔2016ء) گزشتہ ہفتے پاکستان اسٹاک مارکیٹ بلندیوں کی نئی سطح پرپہنچ گئی ، ایم ایس سی آئی میں شمولیت کی خبر آنے کے بعد مارکیٹ نے ماضی کے تمام ریکارڈ توڑ ڈالے۔ صرف ایک ہفتے کے دوران مارکیٹ میں 1800 سے زائد پوائنٹس کا اضافہ ریکارڈ کیا گیااور انڈیکس 38700پوائنٹس کی ریکارڈ سطح پر بند ہواجبکہ مارکیٹ کے سرمائے میں2کھرب سے زائدروپے کااضافہ ریکارڈکیاگیاجس سے سرمائے کاحجم 74کھرب سے بڑھ کر76کھرب روپے کی سطح پرآگیا۔

پاکستان اسٹاک مارکیٹ میں تیزی کے نئے ریکارڈ بننے کا سلسلہ جاری ہے ،مقامی اور بیرونی سرمایہ کاروں کی خریداریمارکیٹ کو اوپر لے جا رہی ہے ۔امریکی فرم مارکن اسٹینلے کی جانب سے پاکستانی معیشت کو ابھرتی ہوئی مارکیٹ قراردیئے جانے کے بعد اسٹاک مارکیٹ نے بلندیوں کی جانب تیزی سے پرواز شروع کر دی ہے حالانکہ مقامی طو رپر مارکیٹ میں تیزی لانے کیلئے کوئی بڑا ٹریگر بھی موجود نہیں تاہم ایم ایس سی آئی میں شمولیت کا مارکیٹ پر اچھااثر پڑا ہے ۔

(جاری ہے)

گذشتہ ہفتے کاروباری تیزی کے باعث ٹریڈنگ کے دوران ایک موقع پرانڈیکس39040پوائنٹس کی بلندسطح پرجا پہنچا تھا تاہم کاروباری اتارچڑھاؤکے سبب ٹریڈنگ کے دوران انڈیکس36600پوائنٹس کم ترین سطح گر گیا تھا لیکن نئی سرمایہ کاری کے رجحان نے مارکیٹ کے پوائنٹس کو نہ صرف ریکور کیا بلکہ مارکیٹ بلندیوں کی نئی سطح پر بھی پہنچ گئی ۔گذشتہ ہفتہ کے ایس ای100انڈیکس 18بالائی حد عبور کرنے میں کامیاب ہو گیا اس طرح انڈیکس میں1836.06پوائنٹس کااضافہ ریکارڈکیاگیاجس سے کے ایس ای100انڈیکس 36940.88پوائنٹس سے بڑھ کر38776.94پوائنٹس کی بلندسطح پرجاپہنچا۔

کے ایس ای30انڈیکس1441پوائنٹس کے اضافے سے22370.82پوائنٹس اورکے ایس ای آل شیئرزانڈیکس24759.50پوائنٹس سے بڑ ھ کر25632.17پوائنٹس کی بلندسطح پربندہوا۔کاروباری تیزی کے سبب مارکیٹ میں سرمائے میں2کھرب62ارب22کروڑ93لاکھ17ہزار282روپے کااضافہ ریکارڈکیاگیاجس کے نتیجے میں سرمائے کامجموعی حجم74کھرب23ارب12کروڑ39لاکھ75ہزار809روپے سے بڑھ کر76کھرب85ارب35کروڑ32لاکھ93ہزار91روپے ہوگیا۔

پاکستان اسٹاک مارکیٹ میں گزشتہ ہفتے زیادہ سے زیادہ25کروڑ57لاکھ82ہزارحصص کے سودے ہوئے اور ٹریڈنگ ویلیو19ارب روپے ریکارڈ کی گئی جبکہ کم سے کم کاروباری لین دین13کروڑ94لاکھ16ہزارحصص رہااور ٹریڈنگ ویلیو7ارب روپے تک محدودرہی۔گزشتہ ہفتے پاکستان اسٹاک مارکیٹ میں مجموعی طورپر1691کمپنیوں کاکاروبارہواجس میں سے802کمپنیوں کے حصص کی قیمتوں میں اضافہ،778میں کمی اور111کمپنیوں کے حصص کی قیمتوں میں استحکام رہا۔کاروبارکے لحاظ سے کے الیکٹرک لمیٹڈ،اینگروفرٹیلائزر،ٹی آرجی پاک لمیٹڈ،پاک انٹرنیشنل بلک،فوجی سیمنٹ،سوئی نادرن گیس کمپنی،ڈی جی کے سیمنٹ،پی ٹی سی ایل،دیوان سیمنٹ،پاک الیکٹرون،حبیب بینک اورایم سی بی بینک لمیٹڈ سرفہرست رہے