سی پیک ملک کی تقدیر بدلنے والا منصوبہ ہے ، مت اسکے ثمرات تمام صوبوں تک منصفانہ طور پر پہنچانے کیلئے اقدامات کرے،آل پاکستان بزنس فور م

ہفتہ 14 جنوری 2017 19:39

کراچی(اُردو پوائنٹ اخبارتازہ ترین - آن لائن۔ 14 جنوری2017ء) آل پاکستا ن بزنس فورم نے کہا ہے کہ چائنا پاکستان اقتصادی راہداری منصوبہ(سی پیک)ملک کی تقدیر بدلنے والا منصوبہ ہے ،تاہم حکومت اس منصوبے کے ثمرات تمام صوبوں تک منصفانہ طور پر پہنچانے کیلئے اقدامات کرے۔آل پاکستان بزنس فور م کے صدر ابراہیم قریشی نے ایک بیان میں کہا ہے کہ سی پیک منصوبہ نہ صرف پاکستان بلکہ تمام خطے کیلئے انفرا اسٹریکچر ترقی اور معاشی نمو کے اعتبار سے اہم ثابت ہوگا،انہوں نے حکومت پر زور دیا کہ سی پیک منصوبے کے ثمرات تمام صوبوں تک منصفانہ طور پر پہنچائے جائیں اور اس منصوبے کو تمام صوبوں کے اتفاق رائے سے مکمل کیا جائے،ان کا کہنا تھا کہ سی پیک منصوبے میں 50ارب ڈالرز سے زائد کی چینی سرمایہ کاری ملک میں آئیگی،اس سرمایہ کاری سے توانائی،انفرا اسٹریکچر اور دیگر منصوبوں پر کام کیا جائیگا،لہذا ا حکومت کیلئے ضروری ہے کہ اس منصوبے کی شفاف تکمیل کیلئے کسی بھی صوبے کی حق تلفی نہ کی جائے اور تمام صوبوں کو سی پیک کے حوالے سے اعتماد میں لیا جائے،ان کا کہنا تھا کہ سی پیک منصوبے میں 34ارب ڈالرز سے زائد مالیت کے توانائی کے منصوبے شامل ہیں اور اس منصوبے تک تحت آئندہ دس برسوں میں قومی گرڈ میں 16500میگاواٹ سے زیادہ کا اضافہ ہوگا۔

(جاری ہے)

ابراہیم قریشی کا کہنا تھا کہ سی پیک منصوبے کے تحت ہم چینی سرمایہ کاری کا خیر مقدم کرتے ہیں اور امید ظاہر کرتے ہیں کہ اس منصوبے کے نتیجے میں نہ صرف دونوں ممالک کے درمیان تعلقات مزید مضبوط ہونگے بلکہ پاکستا ن کی معاشی و اقتصادی ترقی کی رفتار میں دن دوگنی رات چوگنی اضافہ ہوگا،ان کا مزید کہنا تھا کہ سی پیک منصوبے کی کامیابی تمام صوبوں کے اتفاق رائے سے مشروط ہے اور اس ضمن میں وفاق کو تمام صوبوں کے تحفظات دور کرنے کیلئے اقدامات کرنا ہونگے ،ان کا مزید کہنا تھا کہ آل پاکستان بزنس فورم سی پیک منصوبے کی کامیابی اور تمام صوبوں کو اس حوالے سے معاونت کیلئے ہمہ وقت تیار ہے اور ہماری خواہش ہے کہ سی پیک منصوبہ تنازعات سے پاک ہو اور اس میں تمام صوبوں کی فلاح و بہبود کا خیال رکھا جائے۔