تمام بینک معیشت کی ضروریات سمجھتے ہوئے زرعی فنانسنگ پر توجہ مرکوز کریں ، گورنر اسٹیٹ بینک کی ہدایت

کراچی(اُردو پوائنٹ اخبارتازہ ترین - آن لائن۔ 04 فروری2017ء) گورنر اسٹیٹ بینک اشرف محمود وتھرا نے بینکوں پر زور دیا ہے کہ وہ معیشت کی ضروریات کو سمجھیں اور زرعی فنانسنگ پر توجہ مرکوز کریں کیونکہ یہ ایک موثر کاروباری سرگرمی ہے جس میں نقد رقوم کی بھاری آمد و رفت ہوتی ہے، جی ڈی پی میں اس کا حصہ خاصا ہے اور دیگر شعبوں سے اس کے مضبوط روابط ہیں۔

انہوں نے یہ بات ایگریکلچرل کریڈٹ ایڈوائزری کمیٹی (ACAC) کے سالانہ اجلاس سے خطاب کرتے ہوئے کہی۔ اس اجلاس میں اسٹیٹ بینک کے سینئر افسران، کمرشل بینکوں، تخصیصی بینکوں، مائیکروفنانس اور اسلامی بینکوں کے صدور و ایگزیکٹوز اور وفاقی و صوبائی حکومتوں اور کاشتکاروں کے چیمبرز/تنظیموں کے نمائندگان نے شرکت کی۔اپنے کلیدی خطاب میں اشرف وتھرا نے ملک میں زرعی قرضوں کے فروغ کے لیے مرکزی بینک کے سرگرم کردار پر روشنی ڈالی۔

(جاری ہے)

انہوں نے کہا کہ گذشتہ برسوں میں اسٹیٹ بینک، مالی اداروں کے سہولت کار اور ترقیاتی شراکت دار کی حیثیت سے کام کرتا رہا ہے تا کہ ملک میں زرعی قرضوں کی نمو کو بڑھایا جا سکے۔انہوں نے مالی اداروں کو اپنی زرعی قرضوں کی پالیسیاں بہتر بنانے، متحرک افرادی قوت میں اضافے، قرض دینے کے طریقوں کو سادہ بنانے، قرض دینے کی شرحوں کو حقیقت پسندانہ بنانے، عوام میں آگاہی پیدا کرنے کے لیے تندہی سے کام کرنے اور قرضہ جاتی پورٹ فولیوز (portfolios) کی تعمیر کے لیے دیگر تقاضوں کی تکمیل ، کاشت کاروں کو قرضوں کی بروقت فراہمی اور ملک میں زرعی قرضوں کی ممکنہ طلب سے استفادے پر زور دیا جس سے اب تک فائدہ نہیں اٹھایا جا سکا۔

کلیدی خطاب کے بعد ایک بریفنگ دی گئی جس میں زرعی فنانسنگ سے متعلق اہم اظہاریوں (indicators) کے لحاظ سے بینکوں کی کارکردگی کا جائزہ لیا گیا۔بریفنگ میں اسٹیٹ بینک کی جانب سے پسماندہ کاشت کاروں کی مالی خدمات تک رسائی میں بہتری لانے کے لیے کیے گئے اہم اقدامات بھی شامل تھے۔ شرکانے کم مالی خدمات کے حامل صوبوں/علاقوں میں قرضے بڑھانے کے مختلف طریقوں پر غورو خوض کیا۔

ایگریکلچرل کریڈٹ ایڈوائزری کمیٹی (ACAC) کے اراکین کی جانب سے جو تجاویز دی گئیں ان میں دیگر کے علاوہ، زرعی قرضوں کے فروغ کے لیے بینکوں اور حکومتی محکموں کا اشتراک، کم مالی خدمات کے حامل علاقوں میں زرعی قرضوں کے انفراسٹرکچر میں توسیع، مذہب کے لحاظ سے حساس صارفین کی مالی ضروریات پوری کرنے کے لیے شریعت سے ہم آہنگ مصنوعات و خدمات کی تیاری شامل ہیں۔

اجلاس کو آگاہ کیا گیا کہ مالی سال 2015-16کے دوران بینکوں نے 598.3 ارب روپے کے زرعی قرضے تقسیم کیے ، اس کے لیے 600 ارب روپے کے مقررہ مجموعی سالانہ ہدف کا تقریباً 100 فیصد بنتا ہے اوریہ مالی سال 2014-15کے دوران دیے گئے 515.9 ارب روپے کے مقابلے میں 16 فیصد بلند ہے، مزید برآں مالی سال 2016-17کے ابتدائی چھ مہینوں (جولائی تا دسمبر 2016) کے دوران مالی ادارے 301.7 ارب روپے تقسیم کر چکے ہیں جو کہ سال کے لیے مقررہ 700 ارب روپے کے علامتی ہدف کا 43.1 فیصد بنتا ہے۔#