بھارت نے پاکستانی ٹیکسٹائل ملز سے سستے داموں کیے گئے روئی کے برآمدی معاہدے منسوخ کرنے کا اعلان کر دیا

پاکستانی ٹیکسٹائل ملز مالکان نے بھارتی روئی برآمد کنندگان کے اس روئیے پر انٹر نیشنل کاٹن ایسوسی ایشن میں اپیل کرنے کا فیصلہ کیا ہے،احسان الحق

جمعہ 10 فروری 2017 18:54

بھارت نے پاکستانی ٹیکسٹائل ملز سے سستے داموں کیے گئے روئی کے برآمدی معاہدے منسوخ کرنے کا اعلان کر دیا

کراچی (اُردو پوائنٹ اخبارتازہ ترین - این این آئی۔ 10 فروری2017ء) روئی کی قیمتوں میں غیر معمولی تیزی کے رجحان کے باعث بیشتر بھارتی روئی برآمد کنندگان نے ایک بار پھر پاکستانی ٹیکسٹائل ملز سے سستے داموں کیے گئے روئی کے برآمدی معاہدے منسوخ کرنے کا اعلان کر دیا ۔پاکستانی روئی درآمد کنندگان میں تشویش کی لہر جبکہ بعض ٹیکسٹائل ملز مالکان نے انٹر نیشنل کاٹن ایسوسی ایشن (آئی سی ای) میں اپیل کا فیصلہ کر لیا ۔

چیئر مین کاٹن جنرز فورم احسان الحق نے بتایا کہ پاکستانی ٹیکسٹائل ملز مالکان نے دسمبر اور جنوری کے پہلے ہفتے تک مختلف بھارتی روئی برآمد کنندگان سے 73 سے 75 سینٹ فی پائونڈ تک روئی خریداری کے سودے کیے تھے تاہم بھارتی روئی برآمد کنندگان نے روئی کی قیمتوں میں تیزی کے رجحان کے پیش نظر روئی کی ڈیلیوری میں انتہائی سست روی کا مظاہرہ کیا اور چند روز قبل بھارت میں روئی کی قیمتیں 84 سے 85 سینٹ فی پائونڈ تک پہنچنے کے بعد بیشتر بھارتی روئی برآمد کنندگان نے پاکستانی ٹیکسٹائل ملز مالکان کو روئی کی تقریباً 40 ہزار بیلز کے برآمدی معاہدے غیر اعلانیہ طور پر منسوخ کر دیے جبکہ بعض بھارتی برآمد کنندگان نے پاکستانی ٹیکسٹائل ملز مالکان کو 5 سے 6 سینٹ فی پائونڈ مزید لے کر روئی فراہم کرنے پر آمادگی ظاہر کی ہے تاہم پاکستانی ٹیکسٹائل ملز مالکان فی الحال بھارت سے ان شرائط پر روئی درآمد کرنے میں دلچسپی نہیں لے رہے ۔

(جاری ہے)

انہوں نے مزید بتایا کہ بعض پاکستانی ٹیکسٹائل ملز مالکان نے بھارتی روئی برآمد کنندگان کے اس روئیے پر انٹر نیشنل کاٹن ایسوسی ایشن (آئی سی ای) میں اپیل کرنے کا فیصلہ کیا ہے تاکہ بھارتی روئی برآمد کنندگان کو پاکستان سے کئے گئے روئی برآمدی معاہدوں کی تکمیل پر مجبور کیا جا سکے ۔یاد رہے کہ دو سال قبل بھی بھارتی روئی برآمد کنندگان نے روئی کی قیمتوں میں غیر معمولی اضافے کے باعث پاکستان کو بڑی تعداد میں روئی برآمدی معاہدے منسوخ کر دیے تھے ۔