ایف پی سی سی آئی وفد یو نان کے دورے کے بعد وطن واپس پہنچ گیا

لاہور۔16جولائی(اُردو پوائنٹ اخبارتازہ ترین - اے پی پی۔ 16 جولائی2018ء) فیڈریشن آف پاکستان چیمبرز آف کامرس اینڈ انڈسٹری کے ریجنل چیئرمین چوہدری عرفان یوسف کی قیادت میں ایف پی سی سی آئی کا وفد کامیاب دورے کے بعد یو نان سے وطن واپس پہنچ گیا،دورے کے دوران وفد نے تجارتی سرگرمیوں میں اضافے کیلئے یونان کی وزارت خارجہ کے انٹرنیشنل اکنامک افیئرز کے سیکریٹری جنرل مسٹرآئیانوس برجو س سے ملاقات کی، وفد نے تجارتی سرگرمیوں میں اضافے اور باہمی تجارت کے فروغ کیلئے یونان کے ایتھنز چیمبر آف کامرس اینڈ انڈسٹری کے صدر اور ممبران سے بھی ملاقات کی ،ایتھنز چیمبر آف کامرس اینڈ انڈسٹری کے صدر مسٹر یانیس ہیٹیس پائیوی نے کہاکہ چھوٹے اور درمیانے درجے کے کاروباری ادارے پاکستان جیسے ملک کی بڑے درجہ کی مارکیٹ سے فائدہ اٹھا سکتے ہیں، وفد نے یونان کے چیمبر آف کرافٹ اینڈ انڈسٹری کے صدر اور ممبران سے بھی ملاقات کی ، چیمبر آف کرافٹ اینڈ انڈسٹری کے صدر مسٹر پاولوس راوانیز نے کہاکہ وہ بھی جلد ایک وفد لے کر پاکستان آئیں گے اور سرمایہ کاری کے حوالے سے پاکستانی انڈسٹریل ایریا کا دورہ کریں گے، یونان میں پاکستان سفیرخالدعثمان قیصر کی طرف سے پاکستانی سفارت خانہ میں وفد کو عشائیہ دیا گیا جس میں مقامی اور یونان میں مقیم پاکستانی کاروباری برادری اور صحافیوں نے شرکت کی، پاکستان سفیر خالد عثمان قیصر نے ایف پی سی سی آئی کے کاروباری وفد کے سربراہ ریجنل چیئرمین چوہدری عرفان یوسف کو یونان کے کامیاب دورہ پر خراج تحسین پیش کرتے ہوئے تعریفی سند پیش کی۔