حریت کانفرنس کے قائدین کا دورہ پاکستان ‘ آزاد کشمیر کے حریت رہنماؤں ‘سیاسی جماعتوں اور مہاجرین نے پرتپاک استقبال کیلئے تیاریوں کو حتمی شکل دیدی

مظفر آباد(اُردو پوائنٹ اخبار تازہ ترین۔ آئی این پی۔13دسمبر 2012ء) حریت کانفرنس کے قائدین کا دورہ پاکستان و آزاد کشمیر حریت لیڈروں کا پرتپاک استقبال کرنے کیلئے سیاسی جماعتوں اور مہاجرین نے تیاریوں کو حتمی شکل دیدی ، مظفر آباد سمیت آزاد کشمیر بھر میں مقیم مہاجرین اپنے قائدین کا بھرپور استقبال کریں گے ، مظفر آباد میں آزاد کشمیر قانون ساز اسمبلی کی ممبر و سابق ڈپٹی سپیکر محترمہ مہر النساء کی زیرصدارت مہاجرین نمائندگان کا اہم اجلاس منعقد ہوا ، اجلاس میں ماسٹر یوسف بٹ ، اقبال اعوان ، راجہ ولایت خان ، غلام حسن بٹ ، صدیق داؤد، نذر شاہ ، مقصود بٹ ، غلام رسول ، شیخ رشید ، غلام رسول تانرے ، قاسم قریشی ، لیاقت اعوان ، چوہدری شاہ ولی ، شوکت بٹ ، شجاع الحق ، ظہیر خان ، محمود شاہ ، شاہین بٹ ، محمد اقبال ، راجہ عارف ، قاری شمس الدین ، چوہدری قیوم ، شفیق بٹ ، چوہدری فیض ، عاطف لون ، چوہدری مسکین سمیت دیگرمہاجرین نے شرکت کی ، اجلاس سے خطاب کرتے ہوئے محترمہ مہر النساء نے کہا کہ حریت کانفرنس کے قائدین کا دورہ پاکستان و آزاد کشمیر سے تحریک آزادی کشمیر پر مثبت اثرات پڑیں گے ، مہاجرین اور آزاد کشمیر کے عوام اپنے رہنماؤں کا آزاد کشمیر آمد پر فقید المثال استقبال کریں گے ، ان کے دورے سے مہاجرین اور تحریک آزادی سے وابستہ تنظیموں میں خوشی کی لہر دوڑ گئی ہے ، انہوں نے کہاکہ بھارت نے قائدین کو ویزے جاری نہ کرکے اور سفری دستاویزات نہ دے کر کشمیریوں سے روایتی نفرت اور انتقام کا ثبوت دیا ہے ، انہوں نے کہا کہ مہاجرین مظفر آباد آمد پر حریت قیادت کا بھرپور استقبال کرکے تحریک سے اپنی وابستگی کا ثبوت دیں گے ، محترمہ مہر النساء نے تمام مہاجرین کو حریت رہنماؤں کا بھرپور استقبال کرنے کی ہدایت کرتے ہوئے کہا کہ کشمیری قوم نے جس عظیم مقصد اور کاز کیلئے قربانیاں دی ، گھر بار چھوڑے اور ہجرت جیسا غم برداشت کیا وہ ناقابل فراموش ہے۔