سندھ اسمبلی میں دو بلز اتفاق رائے سے منظور کرلئے گئے

کراچی (اُردو پوائنٹ اخبار تازہ ترین۔14 فروری ۔2014ء) سندھ اسمبلی میں جمعہ کو دو بلز اتفاق رائے سے منظور کرلئے گئے ۔ ان میں سے ایک ” دی رجسٹریشن ( سندھ ترمیمی ) بل 2013ء “ اور دوسرا ” سندھ لینڈ ریونیو (ترمیمی ) بل 2013ء “ شامل ہیں ۔ وزیر پارلیمانی امور ڈاکٹر سکندر میندھرو نے ان بلز کے اغراض و مقاصد بیان کرتے ہوئے کہا کہ ہیومن رائٹس کمیشن کیس میں سپریم کورٹ آف پاکستان نے ریونیو ریکارڈ کو کمپیوٹرائز کرنے کا حکم دیا تھا ۔

(جاری ہے)

ان ترمیمی بلز سے کمپیوٹرائزڈ دستاویزات کو قانونی حیثیت حاصل ہو جائے گی ۔ پہلے ان دستاویزات کی قانونی حیثیت نہیں تھی ۔ وزیر پارلیمانی امور نے اعلان کیا کہ سندھ کے ہر ضلع میں ”سروس سینٹرز “ قائم کئے جائیں گے ، جہاں لوگ اپنی پراپرٹی یا زمینوں کی کمپیوٹرائزڈ اور تصدیق شدہ دستاویزات منٹوں میں حاصل کر سکیں گے ۔ انہوں نے کہ کہا صوبے بھر میں 65 فیصد لینڈ ریکارڈ کمپیوٹرائزڈ ہو چکا ہے ۔ صوبے کے تقریباً 800 دیہہ کا ریکارڈ جل گیا تھا یا ضائع ہو گیا تھا ، اس ریکارڈ کی تصدیق کا طریقہ کار بھی وضع کیا جارہا ہے ۔