پنجاب پولیس نے وزیراعلیٰ خیبر پختونخوا سے بھی رشوت مانگ لی، عمران خان کا الزام

جمعہ 23 مئی 2014 19:52

اسلام آباد(اُردو پوائنٹ اخبار تازہ ترین۔23مئی۔2014ء) پاکستان تحریک انصاف کے چیئرمین عمران خان نے الزام عائد کیا ہے کہ پنجاب پولیس نے وزیر اعلیٰ خیبر پختونخوا اور ان کے ساتھی وزراء سے رشوت طلب کی ہے۔پاکستان تحریک انصاف کے چیئرمین عمران خان کا اپنے الزام میں کہنا ہے کہ وزیراعلیٰ اور ان کے ساتھی تین وزراء بغیر پروٹوکول کے لاہور سے اسلام آباد کا سفر کر رہے تھے کہ پنجاب پولیس نے ان سے رشوت طلب کی۔

(جاری ہے)

وزیر اعلیٰ پرویز خٹک اور وزراء نے شناخت کروائی لیکن پنجاب پولیس نے ماننے سے انکار کر دیا اور کہا کہ ہمیں یقین نہیں کہ کوئی وزیر اعلیٰ بغیر پروٹوکول بھی سفر کر سکتا ہے۔ عمران خان کا کہنا تھا کہ پنجاب میں 40 ہزار پولیس اہلکار وی آئی پیز کی ڈیوٹی پر مامور ہیں لیکن خیبر پختونخوا کا کوئی پولیس اہلکار وی آئی پیز کی ڈیوٹی نہیں کر رہا۔ پولیس کو یقین نہ آیا کہ وزیر اعلیٰ خیبر پختونخوا بغیر پروٹوکول بھی سفر کر سکتے ہیں۔