ملکی و غیر ملکی ڈاکٹروں کا پی جی ایم آئی میں تعلیم اور ریسرچ کے معیارپر اعتماد،

لاہور(اُردو پوائنٹ تازہ ترین اخبار۔3ستمبر 2014ء) پوسٹ گریجویٹ میڈیکل انسٹی ٹیوٹ لاہور میں بہترین تدریسی ماحول اور ریسرچ کے زیادہ مواقعوں کی فراہمی کے باعث سیشن 2015میں داخلہ کے حصول کے لیے ملکی و غیر ملکی ڈاکٹروں میں سخت مقابلہ، ڈپلومہ و ڈگری اور ایم فل کورسز کے لیے 2200امیدواروں کی درخواستیں موصول ہوئی ہیں جبکہ گذشتہ سال 1400درخواستیں آئیں تھیں۔

داخلے کے لیے رجسٹریشن کرانے والے تمام امیدواروں کے نام کل پانچ ستمبر کو پی جی ایم آئی ویب سائٹ پر اپ لوڈ کردیئے جائیں گے۔ اس بارے میں انسٹی ٹیوٹ کے پرنسپل پروفیسر انجم حبیب وہرہ نے بتایا کہ ادارے میں طب کے 42شعبوں میں سپیشلائزیشن کے مختلف کورسز کرائے جارہے ہیں۔جن میں داخلہ کے خواہشمند نوجوان ڈاکٹرز کی تعداد میں تیزی سے اضافہ ہورہا ہے جس کی وجہ پی جی ایم آئی میں تعلیم و تدریس کا اعلی بین الاقوامی معیار اور اس کا شاندار ریکارڈ ہے۔

(جاری ہے)

انہوں نے کہاکہ انسٹی ٹیوٹ میں داخلے کے لیے 18اکتوبر کو یونیورسٹی آف ہیلتھ سائنسز میں انٹری ٹیسٹ ہوگا جس کے بعد مطلوبہ اہلیت کے حامل امیدواروں کو شفاف انداز میں میرٹ پر داخلہ دیا جائے گا۔ پروفیسر انجم حبیب نے کہا کہ پی جی ایم آئی سے فارغ التحصیل ڈاکٹرز کو دنیا بھر میں عزت و قدر کی نگاہ سے دیکھا جاتا ہے ۔ یہ ادارہ نہ صرف ریسرچ کے زیادہ سے زیادہ مواقعے کے ذریعے اپنے طلبہ و طالبات کو بہترین تدریسی ماحول فراہم کررہا ہے بلکہ ملک سے برین ڈرین روکنے کا اہم فریضہ بھی سرانجام دے رہا ہے۔

انہوں نے کہا کہ پی جی ایم آئی محمد شہباز شریف کے ویژن کے مطابق حکومت پنجاب کی سرپرستی میں طب کے مختلف شعبوں کے لیے ڈاکٹروں کی سپیشلائزیشن کا انتظام کرتا ہے تاکہ نہ صرف ملک میں سپیشلسٹ ڈاکٹروں کی کمی دور ہوسکے بلکہ مریضوں اور دکھی انسانیت کی بھرپور خدمت کا فریضہ بھی سرانجام دیا جاسکے۔