اکثر طالبان دنیاوی تعلیم حاصل کرناچاہتے ہیں، وائس چانسلر اجمل خان

جمعرات 4 ستمبر 2014 14:41

پشاور(اُردو پوائنٹ تازہ ترین اخبار۔4ستمبر 2014ء) اسلامیہ کالج یونیورسٹی کے بازیاب ہونیوالے وائس چانسلر پروفیسر ڈاکٹر اجمل خان نے کہا ہے کہ تحریک طالبان کے مطابق انھیں حکم ملا تھاکہ سابق وزیراطلاعات میاں افتخارحسین یا اجمل خان کو اٹھا لاؤ۔ طالبان عام انسان ہیں اوراکثریت دنیاوی تعلیم حاصل کرنے کے خواہاں ہے۔ دوران اسیری طالبان نے میرا بہت خیال رکھا۔

تحریک طالبان کے لوگ مجھے حاجی صاحب، سجنا گروپ بابا جب کہ خود حکیم اللٰہ مجھے لالا کہتے تھے، سلمان تاثیر اور یوسف رضا گیلانی کے بیٹوں سے کبھی ملاقات نہیں ہوئی، ان خیالات کا اظہار انھوں نے بدھ کو روزنامہ ایکسپریس سے گفتگو کرتے ہوئے کیا۔ انھوں نے کہا کہ 7 ستمبرکومجھے صبح یونیورسٹی جاتے ہوئے اغوا کیا گیا تاہم اغوا کے بعد مجھے انجکشن لگا کے بے ہوش کردیا گیا جس کے بعد جب ہوش آیا تو پہاڑی علاقے میں تھا۔

(جاری ہے)

انھوں نے بتایا کہ میاں افتخار چونکہ اس وقت وزیر طلاعات تھے اس لیے انھیں اٹھانا آسان نہیں تھا اس لیے طالبان کے لیے میں آسان ہدف تھا لہذا وہ مجھے اغوا کر کے اپنے ساتھ لے گئے۔

اجمل خان نے کہا کہ سجنا گروپ سے خودکش حملوں پر بہت بحث بھی ہوئی جس پرسجنا گروپ نے خود اعتراف کیا کہ بازاروں، مساجد، جنازوں میں خود کش حملوں کو حرام کہتے ہیں اور اسی وجہ سے تحریک طالبان سے سجنا گروپ کا اختلاف بھی ہوا جب کہ ان کا حکومت سے مطالبہ بھی صرف شریعت کا نفاذ ہے کیونکہ ان کے مطابق ہر برے کام کا علاج اسی میں ہے۔