سکولوں میں طلبا ،اساتذہ کی حاضری 92 فیصد، جاری سہولیات اور سکولوں کی انسپکشن 96 فیصد ماہانہ یقینی بنائی گئی ہے‘ مجتبیٰ شجاع الرحمن
بدھ 7 جنوری 2015
17:43
لاہور(اُردو پوائنٹ تازہ ترین اخبار۔ 07 جنوری 2015ء ) وزیر ایکسائز و ٹیکسین ، خزانہ وقانون پنجاب مجتبیٰ شجاع الرحمن نے کہا ہے کہ گزشتہ مالی سال کے دوران اجالا پروگرام کے ذریعے 2.5 ارب روپے سے دو لاکھ طلبہ میں سولر لیمپ تقسیم کئے، طلبہ کو حصول تعلیم کے لئے جدید سہولیات بھی فراہم کی جا رہی ہیں اور میرٹ پر لیپ ٹاپ تقسیم کرنے کا پروگرام اس سال بھی جاری ہے اور ایک لاکھ لیپ ٹاپ فراہم کئے جائیں گے ،ہماری حکومت نے گذشتہ چھ سال کے دوران شعبہ تعلیم کیلئے بجٹ بتدریج بڑھایاہے اور 20لاکھ ناخواندہ افراد کو غیر رسمی تعلیمی فراہم کرنے کے لیے 2ارب 40کروڑ روپے کے فنڈ فراہم کئے گئے ہیں،25لاکھ سے زائد نوجوان مرد و خواتین کو علم و ہنر سکھانے کے لیے صوبہ بھر میں فنکشنل لٹریسی سنٹر اور 14ہزار سے زائد خواتین کے لیے کمیونٹی لرننگ سنٹرز قائم کئے گئے ہیں۔
(جاری ہے)
نوجوانوں کے وفود سے گفتگو کرتے ہوئے مجتبیٰ شجاع الرحمن نے کہا کہ حکومت نے تعلیم کے شعبہ میں ملینیم ڈویلپمنٹ اہداف حاصل کرنے کے لئے2ارب روپے کے فنڈز فراہم کئے ہیں تاکہ عوام کو تعلیم کی جدید سہولتیں مہیا کرکے پرامن اور صحت مندمعاشرے کو فروغ دیا جاسکے ۔ انہوں نے کہا کہ چیف منسٹر ریفارمز روڈ میپ کے تحت سکولوں میں طلبا اور اساتذہ کی حاضری 92 فیصدجبکہ جاری سہولیات اور سکولوں کی انسپکشن 96 فیصد ماہانہ یقینی بنائی گئی ہے جبکہ اس سے قبل سکولوں میں طلباء و اساتذہ کی حاضری 60 فیصد اور موجود سہولیات اور انسپکشن کی شرح 62 فیصد کے قریب تھی ۔
انہوں نے کہا کہ برطانوی ماہر تعلیم سر مائیکل باربر نے حکومت پنجاب کی تعلیمی اصلاحات کو سراہتے ہوئے کہا ہے کہ پنجاب حکومت اور ڈیفڈ کے اشتراک سے جاری اصلاحاتی پروگرام کے باعث پنجاب کے سکولوں میں اساتذہ کی حاضری کا تناسب برطانیہ کے سکولو ں کی سطح تک پہنچ چکا ہے۔ مجتبیٰ شجاع الرحمن نے کہا کہ گزشتہ دور میں ایک لاکھ 40 ہزار سکول ٹیچرز شفاف طریقے سے بھرتی کئے اور مزید سکول ٹیچرز کی خدمات حاصل کی جارہی ہیں تاکہ پنجاب میں100 فیصد خواندگی کا ہدف حاصل کیا جاسکے۔
انہوں نے کہا کہ برطانوی ادارے ڈی ایف آئی ڈی کی جانب سے 351ملین روپے کی امداد سے سرکاری سکولوں میں 15ہزار نئے کلاس رومز تعمیر کئے جائیں گے۔ انہوں نے کہا کہ حکومت معاشرے کے تمام طبقات خصوصا کم وسیلہ لوگو ں کے لئے تعلیم کی سہولتیں فراہم کرنے کوترجیح دے رہی ہے اور انڈوومنٹ فنڈ ، پنجاب ایجوکیشن فاؤنڈیشن کے7ارب 50کروڑ روپے سے زائد کے وظائف اور دیگر وظائف و سہولتیں فراہم کرکے کم وسائل رکھنے والے طلباء و طالبات کو تعلیم کی معیاری و جدید سہولتیں فراہم کرنے کے اقدامات کئے جارہے ہیں ۔
