ایم کیوایم بلدیاتی انتخابات میں بھرپورحصہ لے گی، الطاف حسین کا اعلان

اتوار 10 مئی 2015 00:02

لندن(اُردو پوائنٹ اخبارتازہ ترین - آئی این پی۔9 مئی۔2015ء) متحدہ قومی موومنٹ کے قائد الطاف حسین نے اعلان کیا ہے کہ ایم کیوایم آنے والے بلدیاتی انتخابات میں بھرپورحصہ لے گی اور صوبہ پنجاب سمیت ملک بھر میں اپنے امیدوار نامزد کرے گی ۔ یہ اعلان انہوں نے ہفتہ کے روزبیک وقت ایم کیوایم لاہور، راولپنڈی اورملتان کے دفاتر میں ذمہ داران سے ٹیلی فون پر گفتگو کرتے ہوئے کیا۔

(جاری ہے)

اس موقع پر ایم کیوایم پنجاب کے صدر سینیٹرمیاں عتیق بھی موجود تھے۔ الطاف حسین نے کہاکہ ایم کیوایم آنے والے بلدیاتی انتخابات میں نہ صرف پنجاب سمیت پورے ملک میں اپنے امیدوارنامزدکرے گی بلکہ حق پرست امیدوار اللہ تعالیٰ کی تائیداور مظلوم عوام کی حمایت سے بلدیاتی انتخابات میں کامیابی بھی حاصل کریں گے ۔ الطاف حسین نے اس موقع پر تمام ذمہ داران کو ہدایت کی کہ وہ پنجاب میں عوامی رابطہ تیز کردیں اور صوبہ کے چپہ چپہ میں ایم کیوایم کا پیغام حق پرستی پہنچادیں۔