مونگ کی منظور شدہ اقسام کاشت کر کے 25 من فی ایکڑ تک پیداوار حاصل کی جا سکتی ہے ، محکمہ زراعت پنجاب

کاشتکار ترقی دادہ اقسام کا 10 سے 12کلوگرام بیج فی ایکڑ استعمال کریں، ترجمان

اتوار 17 اپریل 2016 16:05

لاہور (اُردو پوائنٹ اخبار تازہ ترین۔17اپریل۔2016ء) محکمہ زراعت پنجاب نے کہا ہے کہ مونگ کی منظور شدہ اقسام کاشت کر کے 25 من فی ایکڑ تک پیداوار حاصل کی جا سکتی ہے ، کاشتکار ترقی دادہ اقسام کا 10 سے 12کلوگرام بیج فی ایکڑ استعمال کریں ۔ ترجمان کے مطابق نیاب مونگ 2006،نیاب مونگ2011 اور ازری مونگ2006 جبکہ بارانی علاقوں میں چکوال ایم 6کاشت کر کے بہتر پیداوار لی جاسکتی ہے ۔

انہوں نے کہاکہ مونگ کے پودوں کی فی ایکڑ تعداد 135000 سے 170000 ہونی چاہئے۔

(جاری ہے)

انہوں نے کہاکہ جس کھیت میں مونگ پہلی دفعہ کاشت کی جائے اس کے بیج کو نائٹروجن اور فاسفورس کے جراثیمی ٹیکے لگانے سے فصل کا اگاؤ بہتر ہوتا ہے اورپودوں کی نائٹروجن و فاسفورس حاصل کرنے کی صلاحیت بڑھ جاتی ہے اور پیداوار میں نہ صرف خاطر خواہ اضافہ ہوتا ہے بلکہ بعد میں کاشت کی جانے والی فصل کو نائٹروجن بھی مہیا ہوتی رہتی ہے۔انہوں نے بتایاکہ بہاریہ مونگ کی کاشت کیلئے مارچ کا پہلا پندھرواڑہ زیادہ موزوں ہے جبکہ کاشتکار مونگ کو نہری اور بارانی دونوں علاقوں میں یکساں طور پر کامیابی کے ساتھ کاشت کر سکتے ہیں۔