جیکب آباد ‘ڈاکٹر کی مبینہ غفلت باعث معصوم بچہ ہلاک‘ ورثہ کا ڈاکٹر کیخلاف احتجاج، پولیس نے دو ڈسپنسرز کو گرفتار کرلیا

منگل 13 دسمبر 2016 22:37

جیکب آباد(اُردو پوائنٹ اخبارتازہ ترین - آئی این پی۔ 13 دسمبر2016ء) جیکب آباد میں ڈاکٹر کی مبینہ غفلت کے باعث معصوم بچہ فوت، ورثہ کا ڈاکٹر کے خلاف احتجاج، پولیس نے دو ڈسپنسر کو گرفتار کرلیا، تفصیلات کے مطابق جیکب آباد کے سول لائن تھانہ کی حدود اسٹیشن روڈ پر واقعے ڈاکٹر وکرماجیت کی اسپتال میں بلوچستان کے علاقہ پہنور سنڑی کا رہائشی 3 سالہ بچہ زبیر احمد کھوسو ڈاکٹر کی جانب سے مبینہ غلط انجکشن لگنے کے باعث فوت ہوگیا ہے معصوم بچے کے فوت ہونے پر ورثہ کی جانب سے ڈاکٹرکے خلاف احتجا ج کیا گیا مظاہرین نے لاش رکھ کر دھرنا دیا اس موقع پر سول لائن پولیس نے پہنچ کر دو ڈسپنسروں ایاز احمد بھنگر اور عبدل بروہی کوگرفتار کرلیا ہے،اس موقع پر فوت ہونے والے بچے کے ورثہ نے کہا کہ ڈاکٹر کی غفلت کے باعث ہمارا بچہ فوت ہوا ہے ہمارے بچے کو معمولی بخار تھا مگر ڈاکٹر نے غلط انجکشن لگایا جس سے بچہ فوت ہوا ہے،ورثہ نیالزام عائد کیا کہ ڈاکٹر نے بچے کو ہائی ڈوز دیا اس لیے ڈاکٹر کے خلاف مقدمہ درج کیا جائے،بعدازاں ورثہ نے پولیس کی یقین دہانی پر احتجاج ختم کیا۔