سرکاری ملازمین اور ان کے لواحقین کے مسائل کے فوری حل کیلئے عملی اقدامات کئے جارہے ہیں،ڈی اے اومظفر گڑھ

مظفر گڑھ۔10 فروری(اُردو پوائنٹ اخبارتازہ ترین - اے پی پی۔ 10 فروری2017ء)ڈسٹرکٹ اکائونٹس آفیسر انوار الحق چشتی نے کہا ہے کہ سرکاری ملازمین اور ان کے لواحقین کے مسائل کے فوری حل اور کرپشن کے خاتمے کیلئے عملی اقدامات کئے جارہے ہیں، انہوںنے کہا ڈسٹرکٹ اکائونٹس آفس نے ہی نیشنل بینک آف پاکستان مظفرگڑھ میںپینشن کی مد میں ہونے والی 42کروڑ روپے کی کرپشن کو بے نقاب کیا تھا، انہوں نے کہا کہ ڈسٹرکٹ اکائونٹس آفس کے تمام نظام کمپیوٹرائزڈ ہے جس میں کسی بھی قسم کی بدعنوانی ناممکن ہے ، تاہم اگر دفترکا کوئی اہلکار کسی بھی سرکاری ملازم، ریٹائرڈ ملازم یا ان کے لواحقین سے کسی بھی مد میں کوئی رقم طلب کرتا ہے تو فوری طور پر ان سے رابطہ کیا جائے ان کی شکایات کا فوری ازالہ کیا جائے گا اور متعلقہ اہلکار کے خلاف کاروائی عمل میں لائی جائے گی، ڈسٹرکٹ اکائونٹس آفیسر انوار الحق چشتی نے مزید بتایا کہ ضلعی تنظیم ایپکا کی جانب سے ایڈیٹر کاشف مگسی کے خلاف دی جانے والی درخواست پر ایکشن لیتے ہوئے کاشف مگسی سے جواب طلب کرلیا گیا ہے اور متنازعہ سروس بک پر محکمانہ اعتراضات دور کرانے کے بعد مکمل کردی گئی ہے ، انہوں نے کہا کہ سرکاری ملازمین، ریٹائرڈ ملازمین اور ان کے لواحقین کے مسائل کے حل کیلئے میرے دفتر کے دروازے ہر وقت کھلے ہیں۔