افغانستان بم دھماکے میں زخمی ہونے والے متحدہ عرب امارات کے سفیر چل بسے

بدھ 15 فروری 2017 23:08

ابو ظہبی(اُردو پوائنٹ اخبارتازہ ترین - این این آئی۔ 15 فروری2017ء) گزشتہ ماہ قندھار بم دھماکے میں شدید زخمی ہونے والے متحدہ عرب امارات کے سفیر جمعہ محمد عبداللہ الکابی زخموں کی تاب نہ لاتے ہوئے جاں بحق ہوگئے۔

(جاری ہے)

متحدہ عرب امارات کی وزارتِ خارجہ کی جانب سے جاری بیان میں کہا گیا کہ ہم نہایت افسوس کے ساتھ اعلان کرتے ہیں کہ قندھار بم دھماکے میں شدید زخمی ہونے والے یو اے ای کے سفیر جمعہ محمد الکابی زخموں کی تاب نہ لاتے ہوئے جاں بحق ہوگئے ہیں جنہوں نے اپنے فرائض کی انجام دہی کے دوران جان دی۔

واضح رہے کہ جمعہ محمد الکابی کو 10 جنوری کو قندھار میں نشانہ بنایا گیا تھا اور بم حملے میں امارات کے 5 امدادی کارکن بھی ہلاک ہوگئے تھے۔ جمعہ محمد الکابی اس حملے میں شدید زخمی ہوگئے تھے جو ابوظہبی کے ایک ہسپتال میں زیرِ علاج تھے۔