عمران خان دہشت گردوں کے سب سے بڑے سہولت کار ،شاہ محمودڈبل شاہ اور جہانگیرترین قوم کے ڈاکو ہیں ، عمران بال ٹھاکرے کے چھوٹے بھائی ،ان کو بھارت بھجوا دیاجائے ،چیئرمین پی ٹی آئی نے پختونوں اور پنجابیوں کو لڑانے کی کوشش کی ،جوکام بھارت نہیں کرسکا وہ عمران خان نے کردیا ،ملک بھر میں نادہندگان کے خلاف بلاامتیاز آپریشن شروع کردیاگیا ، ڈیفالٹر خواہ کتنا ہی بااثر کیوں نہ ہو ان کے کنکشنز فوری طورپر منقطع کرنے کے احکامات دے دئیے ،تنقید کرنے والے پہلے کرپشن کا حساب دیں ، ترقی بعض سیاسی جماعتوں کو ہضم نہیں ہورہی،ترقی کا راستہ روکنے کیلئے جان بوجھ کر حالات خراب کرنے کی کوششیں کی جارہی ہیں ،حکومت اندرونی اور بیرونی دہشت گردوں سے ڈرے بغیر اپنا کام کررہی ہے

ملتان(اُردو پوائنٹ اخبارتازہ ترین - آئی این پی۔ 01 مارچ2017ء) وزیر مملکت پانی وبجلی عابدشیرعلی نے کہا ہے کہ عمران خان بال ٹھاکرے کے چھوٹے بھائی ہیں اوربال ٹھاکرے کی زبان بولنے والے کو بھارت بھجوا دینا چاہیے ،چیئرمین تحریک انصاف نے پختونوں اور پنجابیوں کو لڑانے کی کوشش کی ،جوکام بھارت نہیں کرسکا وہ عمران خان نے کردیا ،عمران خان ناصرف دہشت گردوں کے سب سے بڑے سہولت کار ہیں بلکہ یہ اسلام آباد میں دہشت گردوں کا دفتر بھی قائم کرنا چاہتے تھے۔

شاہ محمودڈبل شاہ اور جہانگیرترین قوم کے ڈاکو ہیں،ملتوی خان کی باتیں اب نہیں چلیں گی،پاناما سے سرخرو ہوکر گلی گلی کرکٹ کھیلیں گے،تنقید کرنے والے پہلے کرپشن کا حساب دیں ،مولا بخش چانڈیوکو کراچی کی صفائی کا ٹھیکہ دینا چاہیے،ملتان میں میپکو ہیڈاکورٹر میں میڈیا سے گفتگو کرتے ہوئے وزیرمملکت پانی و بجلی عابدشیرعلی سیاسی مخالفین پر برس پڑے ،عابدشیرعلی کا کہنا تھا کہ پاناما کیس میں ہمارے قائدین نے تین پشتوں کا حساب دیا ، مخدوموں کے ڈبل شاہ کو بھی اب حساب دینا ہوگا ، شاہ محمود بتائیں دربار سے ملنے والے کروڑوں روپے سے کتنی بیواؤں کے سر پر ہاتھ رکھا، جہانگیر ترین ڈاکو ہے اور اس کا منشی عمران خان ہے، جہانگیر ترین نے کسانوں کا مال کھایا اور استحصال کیا۔

(جاری ہے)

اس موقع پر مسلم لیگ(ن)یوتھ ونگ کے ضلعی سینئرنائب صدر عبدالرحمن فری ،سہیل فراز اور اعلیٰ میپکو حکام بھی موجود تھے ،عابدشیرعلی کا اس موقع پر میڈیا سے گفتگو کرتے ہوئے کہنا تھا کہ پنجاب میں پختونوں کے ساتھ ظلم کے بیان پر عمران خان کو شرم آنی چاہیے،عمران خان ناصرف دہشت گردوں کے سب سے بڑے سہولت کار ہیں بلکہ یہ اسلام آباد میں دہشت گردوں کا دفتر بھی قائم کرنا چاہتے تھے، انہوں نے پاکستان کو توڑنے کی سازش کی اور نفرت کا بیج بویا ہے تاہم جو کام بھارت نہیں کرسکا وہ عمران خان نے کردیا۔

انہوں نے کہا کہ عمران خان بال ٹھاکرے کے چھوٹے بھائی ہیں اوربال ٹھاکرے کی زبان بولنے والے کو بھارت بھجوا دینا چاہیے۔انہوں نے کہا کہ عمران خان گوجرانوالہ میں اشتہاری ہیں،پولیس اب عمران خان کوہتھکڑی لگاکرعدالت لائے گی۔، انہوں نے کہا کہ ایان علی ڈالرز کے ساتھ پکڑی گئی، چارٹرجہاز میں چلی گئی، قوم دیکھتی رہ گئی۔ انہوں نے چئیرمین پیپلزپارٹی کو مخاطب کرتے ہوئے کہا کہ بلاول صاحب،چانڈیو کو کراچی صاف کرنے کا ٹھیکہ دے دیں،چانڈیو صاحب پہلے شہر کو صاف کریں اور کرپشن کا حساب دیں پھر تنقید کریں۔

کرپشن کیخلاف بھاشن دینے والوں کی کرپشن کی داستانیں لوگوں کی زبان پر ہیں۔پاکستان کے لوگ آئندہ الیکشن میں بھی کارگردگی کی بنیاد پرووٹ دیں گے ،انہوں نے مزید کہا کہ وزیراعظم نوازشریف نے قوم سے جووعدہ کیا تھا ،اس کی تکمیل کا وقت آگیا ،رمضان سے قبل قوم بجلی کی لوڈشیڈنگ کے مکمل خاتمے کی نوید سنے گی۔قبل ازیں میپکو ہیڈکوارٹر میں سینئرصحافیوں سے گفتگو کرتے ہوئے وزیر مملکت برائے پانی وبجلی چوہدری عابد شیر علی نے کہا کہ ملک بھر میں نادہندگان کے خلاف بلاامتیاز آپریشن شروع کردیاگیاہے ۔

ڈیفالٹر خواہ کتنا ہی بااثر کیوں نہ ہو ان کے کنکشنز فوری طورپر منقطع کرنے کے احکامات دے دئیے گئے ہیں ،اس موقع پرچیف ایگزیکٹو آفیسر میپکو انجینئر مسعود صلاح الدین اور جنرل منیجر ریونیو اینڈ کمرشل آپریشنز پیپکو محمد سلیم بھی ان کے ہمراہ تھے ۔ عابدشیرعلی نے کہا کہ حکومت بجلی بحران کے خاتمہ کے لئے دن رات جدوجہد کررہی ہے ۔ بجلی کی ہزاروں میگاواٹ پیداوار کے پانی، گیس، ایل این جی، کوئلہ، سولر اور ونڈ انرجی کے منصوبوں پر کام تیزی سے جاری ہے ۔

رواں سال موسم گرما میں گزشتہ سال کی نسبت لوڈشیڈنگ کم کی جائے گی ۔ انہوں نے کہا کہ دو روز قبل 220KVچشتیاں گرڈاسٹیشن کا افتتاح کیاگیاہے ۔2ارب 63کروڑروپے کی لاگت سے مکمل ہونے والے ا س منصوبے سے ضلع بہاولنگر میں بجلی کا نظام مستحکم ہوا اور وولٹیج لیول بہتر ہواہے ۔ اس گرڈاسٹیشن سے میپکو کے 132KVاستعدادکار کے 6گرڈاسٹیشنز جو بجلی مہیاکی جائے گی جو چشتیاں، بہاولنگر، حاصلپور، نورسر، ہارون آباد، ڈاہرانوالہ اور فورٹ عباس کے شہری اور دیہی علاقوں کی بجلی ضروریات پوری کریں گے ۔

انہوں نے کہا کہ موجودہ حکومت لوڈشیڈنگ کے خاتمہ کے لئے پُر عزم ہے ۔ پنجاب، سندھ، بلوچستان، کے پی کے اور آزادکشمیر میں بجلی کے تقسیمی نظام کی اپ گریڈیشن کی کی گئی ہے جس پر اربوں روپے خرچ کئے گئے ہیں ۔ رواں سال میں ایل این جی سے 3600میگاواٹ بجلی کی پیداوار کے بکھی پاور پلانٹ، بلوکی پاورپلانٹ اور حویلی بہادرشاہ پاورپلانٹ، 1320میگاواٹ کے قادر آباد کول پاورپلانٹ ، 1320میگاواٹ کے پورٹ قاسم پاورپلانٹ کراچی اور دیگر منصوبوں سے بجلی کی پیداوار شروع ہوجائے گی ۔

انہوں نے کہا کہ ملک ترقی کی جانب گامزن ہے ۔ یہ ترقی مختلف سیاسی جماعتوں سے ہضم نہیں ہورہی۔ ترقی کا راستہ روکنے کے لئے جان بوجھ کر حالات خراب کرنے کی کوششیں کی جارہی ہیں لیکن مسلم لیگ (ن) کی حکومت اندرونی اور بیرونی دہشت گردوں سے ڈرے بغیر اپنا کام کررہی ہے ۔ انہوں نے کہا کہ میپکو نے 4ارب 80کروڑروپے کی لاگت سے گرڈاسٹیشنوں کی22منصوبے مکمل کئے ہیں جبکہ 3ارب 88کروڑ60لاکھ روپے کی لاگت سے ٹرانسمیشن لائنوںکے 33منصوبے، 3ارب 39کروڑ50لاکھ روپے کی لاگت سے گرڈاسٹیشنوں کی آگمینٹیشن /ایکسٹینشن 109منصوبے مکمل کئے ہیں جس سے ڈسٹری بیوشن سسٹم مضبوط ہوگیاہے اور صارفین کو بہتر وولٹیج کے ساتھ بجلی مل رہی ہے ۔

جنوبی پنجاب کے 13اضلاع میں 2700نئے دیہاتوں کو روشن کیاگیاہے ۔900کلومیٹر گیارہ کے وی لائن، 350کلومیٹر لوٹینشن لائن بچھائی گئی ہے ۔296لوٹینشن سکیموں پر کام مکمل ، 395ٹو فیز پر چلنے والے ڈسٹری بیوشن ٹرانسفارمرز تبدیل اور 409ڈسٹری بیوشن ٹرانسفارمرز کی استعدادکار میں اضافہ کیاگیاہے ۔ انہوں نے کہا کہ رواں مالی سال 2016-07؁ء کے دوران میپکو ریجن میں صارفین سے بلنگ کی مد میں ماہانہ اور پروگریسو ریکوری کی شرح 100فیصد رہی ہے ۔

بجلی چوروں کو 53کروڑ70لاکھ روپے جرمانہ عائد اور 1102مقدمات کا اندراج کروایاگیاہے ۔ انہوں نے کہا کہ صارفین کی شکایات کے بروقت ازالے کے لئے بجلی کی تقسیم کار کمپنیوں کے سربراہان کو ہدایت کی گئی ہے کہ وہ اپنے سرکلوں اور ڈویژنوں کے افسران کی کارکردگی کو خود مانیٹر کریں اور شکایات سنٹر پر چھاپے ماریں ۔ صارفین کی شکایات کے ازالے میں کوتاہی برتنے والے افسران اور ملازمین کے خلاف سخت محکمانہ کاروائی کریں ۔