حکومت اندرونی اور بیرونی دشمنوں سے باخبر ہے، امن پسندی کو ہماری کمزوری نہ سمجھا جائے، وفاقی وزیر خواجہ محمد آصف

ہفتہ 11 مارچ 2017 22:53

حکومت اندرونی اور بیرونی دشمنوں سے باخبر ہے، امن پسندی کو ہماری کمزوری ..
سیالکوٹ۔11 مارچ(اُردو پوائنٹ اخبارتازہ ترین - اے پی پی۔ 11 مارچ2017ء)وفاقی وزیر دفاع ، پانی و بجلی خواجہ محمد آصف نے ڈسٹرکٹ بار ایسوسی ایشن سیالکوٹ کے نو منتخب عہدیداران سے حلف لیا اور ڈسٹرکٹ بار ایسوسی ایشن کیلئے 1کروڑ روپے دینے کا اعلان کیا۔میئر ایم سی ایس توحید اختر چودھری، ایم ایل اے چودھری محمد اسحاق،ضلعی صدر مسلم لیگ ن سیالکوٹ ادریس احمد باجوہ، جنرل سیکرٹری شجاعت علی پاشا،نومنتخب صدر ڈسٹرکٹ بار ایسوسی ایشن شوکت علی ایڈووکیٹ ،سیکرٹری زاہد سلیم باجوہ اور محمو دالحسن بابر خاں، رانا عبد الوحید ،مرزا ابرار بیگ کے علاوہ متعلقہ کثیر تعداد میں ممبران ڈسٹرکٹ بار کونسل نے شرکت کی ۔

وفاقی وزیر دفاع ، پانی و بجلی خواجہ محمد آصف نے کہا کہ حکومت پاکستان کے اندرونی اور بیرونی دشمنوں سے باخبر ہے اور ہماری امن پسندی کو ہماری کمزوری نہ سمجھا جائے ۔

(جاری ہے)

پاکستانی قوم اپنی بہادر افواج کے ساتھ کھڑی ہے اور کسی بھی صورتحال سے نمبرد آزما ہونے کیلئے ہمہ وقت تیار ہے ۔ انہوں نے کہاکہ مسلم لیگ ن کے موجودہ دور حکومت میں سیالکوٹ میں خاطر خواہ ترقیاتی کام ہوئے ہیں بالخصوص شعبہ تعلیم پر خاص توجہ دی گئی ہے ۔

انہوں نے کہاکہ خواجہ محمد صفدر میڈیکل کالج اور گورنمنٹ کالج وویمن یونیورسٹی سیالکوٹ کے قیام کے بعد نیشنل یونیورسٹی آف سائنسز اینڈ ٹیکنالوجی کے کیمپس کیلئے وزیر اعظم پاکستان نے منظوری دے دی ہے ۔ انہوں نے کہاکہ ٹیکسٹائل ، بحریہ یونیورسٹی اور ایگری کلچرل یونیورسٹیوں کے کیمپسسز کا بھی جلد اجراء کیا جائے گا۔انہوں نے کہاکہ سیالکوٹ میںاعلیٰ تعلیمی درسگاہوں کے قیام کا مقصد شہر اقبال کی مردم خیز مٹی وطن عزیز کیلئے اقبال اور قائد جیسے سپوت پیدا کرنا ہے جن پر پوری قوم فخر کرسکے ۔

انہوں نے کہاکہ یہ درسگاہیں ناصرف علاقہ بلکہ قوم کی تقدیر بدل دیں گی ۔ سیالکوٹ لاہور موٹر وے پر کام کا آغاز ہوچکا ہے اور ڈیڑھ سال کے مختصر عرصہ میں مکمل کیا جائے گا۔ وفاقی وزیر نے کہا کہ ضلع کچہری میں صبح8بجے سے دووپہر 4بجے تک بجلی کی لوڈشیڈنگ نہیں کی جائے گی تاکہ سائلین کو پریشانی کا سامنا نہ کرنا پڑے ۔ خواجہ محمد آصف نے کہاکہ بلدیاتی اداروں کو مضبوط بنا کرہی جمہوری اداروں کو مضبوط بنایا جاسکتا ہے۔

انہوں نے کہاکہ ہماری سیاست پر لوگوں کو اختلاف بھی ہوسکتا ہے لیکن مجھے اپنی سیاسی وفاداری پر ناز ہے ۔ انہوں نے کہاکہ فوجی عدالتوں بنانا اس بات کو تسلیم کرنا ہے کہ ہمارے ملکی حالات بہتر نہیں ہیں۔ انہوں نے کہاکہ جولوگ دہشت گردانہ کارروائیوں میں ملوث ہیں کسی کو نہیں پتہ ان کا تعلق کس مذہب سے ہے جن کو یہ تمیز نہیں کہ وہ سکولوں، عبادت گاہوں اور پبلک مقامات پر نہتے اور بے گناہ شہریوں کو بے دردی سے نشانہ بنا رہے ہیں ۔ انہوں نے کہاکہ معاشرے کو دہشت گردی سے مکمل طور پر پاک کرنے کیلئے ہمیں اجتماعی سوچ پیدا کرنا ہوگی اور اپنی ذاتی اور گروہی اختلافات کو بالا طاق رکھنا ہوگا۔