پنجاب یونیورسٹی انتظامیہ نے پہلے مرحلے میں ہنگامہ آرائی میں ملوث 17 طلباء کے خلاف کارروائی کا آغاز کر دیا

لاہور(اُردو پوائنٹ اخبارتازہ ترین - این این آئی۔ 13 اپریل2017ء) پنجاب یونیورسٹی انتظامیہ نے 21 مارچ کو ادارہ تعلیم و تحقیق کے باہر ہنگامہ آرائی کرنے والے طلباء کی نشاندہی کے بعد ان کے خلاف کارروائی کا باقاعدہ آغاز کر دیا ہے پنجاب یونیورسٹی کے ترجمان خرم شہزاد کے مطابق انکوائری کمیٹی کی سفارشات کی روشنی میں جن طلباء اور بیرونی عناصر کی نشاندہی کی گئی ہے ، پہلے مرحلے میں ان طلباء میں سے قواعد کی سنگین خلاف ورزی اور ہنگامہ آرائی میں ملوث 17 طلباء کے خلاف کارروائی کرتے ہوئے دس طلباء کومعطل کرتے ہوئے چارج شیٹ جاری کر دی ہے ۔

اور ان طلباء سے 7 روز میں جواب طلب کر لیا ہے۔ علاوہ ازیں واقعہ میں ملوث 7 خارج شدہ طلباء کے کوائف قانونی کارروائی کے لئے پولیس کو فراہم کر دئیے گئے ہیں۔

(جاری ہے)

پنجاب یونیورسٹی کے ترجمان نے کہا ہے کہ انکوائری کمیٹی کی سفارشات پر عملدرآمد کیا جائے گا اور واقعے میں ملوث تمام طلباء کے خلاف مرحلہ وار انضباطی کارروائی کی جائے گی اور کیمپس میں پر امن ماحول کو ہر صورت قائم رکھا جائے گا۔

پنجا ب یونیورسٹی انتظامیہ نی21 مارچ کی ہنگامی آرائی میں ملوث ہونے پرجن طلباء کے خلاف کارروائی کی ہے ان میں انسٹی ٹیوٹ آف جیالوجی کے عبدالرحمن اور صائم اللہ، ہیلی کالج آف کامرس کے عثمان رنگ الہی، اسلامک سٹڈیز کے محمد عظیم قریشی، انسٹی ٹیوٹ آف بائیوکیمسٹری و بائیو ٹیکنالوجی کے ہدایت اللہ اور بہادر خان، شعبہ سپیس سائنس کے اسامہ بن شفاعت، شیخ زید اسلامک سنٹر کے عبدالبصیر اور نقیب اللہ اور یونیورسٹی لاء کالج کے ولید منصور شامل ہیں۔