نیب بدعنوانی کے خاتمے کے لئے پرعزم ہے ، نیب نے حالیہ تین سالوں کے دوران ملتان ‘ سکھر اور گلگت بلتستان میں اپنے تین علاقائی دفتر قائم کرنے سمیت کئی اقدامات اٹھائے ہیں ،چیئرمین نیب قمرزمان چوہدری

اسلام آباد(اُردو پوائنٹ اخبارتازہ ترین - آئی این پی۔ 06 مئی2017ء) چیئرمین نیب قمرزمان چوہدری نے کہا ہے کہ نیب کسی بھی قیمت پر بدعنوانی کے خاتمے کے لئے پرعزم ہے جو کہ ہر برائی کی جڑ ہے، نیب نے حالیہ تین سالوں کے دوران ملتان ‘ سکھر اور گلگت بلتستان میں اپنے تین علاقائی دفتر قائم کرنے سمیت کئی اقدامات اٹھائیں ہیں ۔ہفتہ کو ایک بیان میں انہوں نے کہا کہ نیب نے بڑی مقدار میں لوٹے گئے پیسے واپس لیکر قومی خزانے میں جمع کرائے ہیں موجودہ مدت میں نیب نے انسداد بدعنوانی کی حکمت عملی کے تحت جامع اور فعال حکمت عملی اختیار کی ہے جس میں کرپشن کے خلاف آگاہی اس کی روک تھام اور ملک سے اس کو جڑ سے اکھاڑ پھینکنے کے لئے اقدامات شامل ہیں۔

چیئرمین نیب نے کہا کہ نیب کی بنیادی توجہ مالیاتی کمپنیوں کے فراڈ ‘ بینک فراڈ ‘ بینکوں کے ناہندگان‘ اختیار کے ناجائز استعمال اور ریاست کے فنڈزمیں حکومتی ملازمین کی جانب سے خرد برد شامل ہے۔

(جاری ہے)

انہوں نے کہا کہ نیب کے تمام ادارہ جاتی کمزوریوں کا جائزہ لے کر اس کے تمام شعبوں کو ازسرنو فعال کیا گیا ہے۔اس کے مقدمات نمٹانے کا دورانیہ زیادہ سے زیادہ 10 ماہ کیا گیا ہے۔

نیب نے سی آئی ٹی کا نیا نظام متعارف کرایا ہے ۔ جس میں ڈائریکٹر ‘ ایڈیشنل ڈائریکٹر ‘ انویسٹی گیشن آفیسر اور سینئر لیگل قونصل شامل ہیں۔انہوں نے کہا کہ نیب نے راولپنڈی میں جدید آرٹ فورینزک سائنس لیبارٹری قائم کی ہے۔نیب کے تمام ریجنز کی کارکردگی کی مانیٹرنگ کے لئے (کیو جی سسٹم ) متعارف کرایا گیا ہے۔جس میں سالانہ بنیادوں پر تمام علاقائی دفاتر اور ہیڈ کوارٹر کی کارکردگی کا جائزہ لیا جاتا ہے۔

انہوں نے کہا کہ نیب نے اندرونی احتساب کے میکنزم کا نظام بھی متعارف کرایا ہے اس وقت تک 84آفیسران میں سے 23 کوملازمت سے برخاستگی سمیت بڑی سزائیں دی گئیں ہیں۔ جبکہ 34 کو معمولی سزائیں دی گئیں ہیں۔ کسی بھی ادارے میں اندرونی طور پر احتساب کی یہ سب سے بڑی مثال ہے اورایک ریکارڈ ہے۔انہوں نے کہا کہ سی ڈی اے ‘ وزارت مذہبی امور ‘ خوراک و زراعت ‘ قومی صحت ‘ ایف بی آر ‘ پی آئی ڈی کے علاوہ صوبائی سطح پر صحت ‘ تعلیم اور ہائوسنگ میں پریونشن کمیٹیاں تشکیل دیں ہیں۔