لاہورہائیکورٹ، مال ر وڈ پر جلسے جلوسوں پر پابندی کے حکم پر حکومت پنجاب سے عمل درآمد رپورٹ طلب کر لی

بدھ 12 جولائی 2017 23:36

لاہور۔ (اُردو پوائنٹ اخبارتازہ ترین - اے پی پی۔ 12 جولائی2017ء) لاہورہائیکورٹ نے مال ر وڈ پر جلسے جلوسوں پر پابندی کا حکم ہوا میں اڑانے کے خلاف دائر درخواست پر حکومت پنجاب سے عمل درآمد رپورٹ طلب کر لی۔

(جاری ہے)

عدالت کے روبرودرخواست گزارنے موقف اختیار کیا کہ عدالت عالیہ نے مال روڈ پر احتجاجی مظاہروں پرپابندی لگا رکھی ہے جبکہ مظاہرین کو لاہور کے دو مقامات ناصرباغ اور عتیق سٹیڈیم تک محدود کرنے کے واضح احکامات صادر کر رکھے ہیں،عدالتی حکم کے تحت ضلعی حکومت نے پابندی کا نوٹیفیکیشن جاری کیا مگر اس پر عمل درآمد نہیں کرایا جا رہا۔

انہوں نے کہا کہ عدالتی حکم کے باوجود مال روڈ احتجاجی ریلیوں،جلسے،جلوسوں کا گڑھ بن چکا ہے جس سے ٹریفک میں خلل پیدا ہوتا ہے اور کاروبار زندگی تباہ ہو جاتے ہیں۔سرکاری وکیل نے عدالت کو آگاہ کیا کہ عدالتی حکم پر من و عن عمل درآمد کیا جا رہا ہے۔جس پرعدالت نے کیس کی سماعت ملتوی کرتے ہوئے عمل درآمد رپورٹ طلب کر لی۔