دنیا کی ایک بدترین آمریت کیخلاف بیگم نصرت بھٹو کی جدوجہد اور قربانیاں تاریخ کا ناقابل فراموش باب ہے،بلاول

اتوار 22 اکتوبر 2017 23:21

کراچی (اُردو پوائنٹ اخبارتازہ ترین - آئی این پی۔ 22 اکتوبر2017ء) پاکستان پیپلز پارٹی کے چیئرمین بلاول بھٹو زرداری نے مادرِ جمہوریت بیگم نصرت بھٹو کو ان کی چھٹی برسی کے موقعے پر زبردست خراج عقیدت پیش کرتے ہوئے کہا ہے کہ دنیا کی ایک بدترین آمریت کے خلاف بیگم نصرت بھٹو کی جدوجہد اور قربانیاں تاریخ کا ناقابلِ فراموش باب ہے۔

(جاری ہے)

پی پی پی چیئرمین نے کہا کہ شہید ذوالفقار علی بھٹو کی شہادت کے بعد انہوں نے ایک انقلابی خاتون رہنما کا کردار ادا کرتے ہوئے عوام کو امید اور جیالوں کو نیا عزم و حوصلہ دیا اور جدوجہد کو منظم کیا۔

انہوں نے کہا کہ بیگم نصرت بھٹو نے جدوجہد کے دوران ذاتی قربانیوں اور صبر کا وہ عملی نمونہ پیش کیا جو دنیا بھر کے سیاسی کارکنان کے لیئے مشعلِ راہ ہے۔ بلاول بھٹو زرداری نے کارکنان پر زور دیا کہ بیگم نصرت بھٹو کو خراج عقیدت پیش کرنے کا بہترین طریقہ یہ ہے کہ آج کے دن پاکستان کو پرامن، جمہوری اور خوشحال ملک بنانے کے لیئے پارٹی کے نظریئے اور پروگرام سے تجدید عہدِ وفا کیا جائے۔