سانحہ اے پی ایس کی عظیم قربانی نے دہشت گردوں کیخلاف پوری قوم کو سیسہ پلائی ہوئی دیوار کی طرح متحد کردیا ،گورنر سندھ

ہفتہ 16 دسمبر 2017 21:36

کراچی(اُردو پوائنٹ اخبارتازہ ترین - آئی این پی۔ 16 دسمبر2017ء) گورنر سندھ محمد زبیر نے سانحہ آرمی پبلک اسکول پشاور کی تیسری برسی پر شہدا ء کو خراج تحسین پیش کرتے ہوئے کہا کہ ان کی عظیم قربانی نے دہشت گردوں کے خلاف پوری قوم کو سیسہ پلائی ہوئی دیوار کی طرح متحد کردیا،سکول کے بچوں نے اپنی جان قربان کرکے دہشتگردوں کے مذموم عزائم کو ناکام بنایا۔

(جاری ہے)

گورنر سندھ نے کہا کہ قوم ان کی اس عظیم قربانی کو کسی صورت فراموش نہیں کرسکتی اور ان بچوں کی عظیم قربانی قوم کو ہمیشہ یاد رہے گی، آج کا دن دہشت گردی کے خلاف ہمارے عزم کو مزید پختہ کرتا ہے اور پوری قوم کا یہ عہد ہے کہ آخری دہشت گرد کے خاتمہ تک ہم چین سے نہیں بیٹھیں گے۔ گورنر سندھ نے کہا کہ ہماری مسلح افواج نے دہشت گردی کے خلاف جنگ میں ہر اول دستہ کا کردار ادا کرتے ہوئے عالمی امن کو یقینی بنانے کے لئے اپنی قیمتی جانوں کا نذرانہ پیش کیا ہے جس کا اعتراف پوری دنیا کرتی ہے۔ انہوں نے کہا کہ پوری قوم دہشت گردی کے خلاف جنگ میں اپنی مسلح افواج کو خراج تحسین پیش کیا۔