نوازشریف پاکستان کو بدنام کررہے ہیں ،ہم نہیں تو کوئی بھی نہیں’ کی سیاست اب نہیں چلے گی،ڈاکٹرعاصم

جمعہ 29 دسمبر 2017 21:44

کراچی(اُردو پوائنٹ اخبارتازہ ترین - آئی این پی۔ 29 دسمبر2017ء) پیپلزپارٹی کے رہنما ڈاکٹرعاصم نے کہاہے کہ نوازشریف پاکستان کو بدنام کررہے ہیں،ہم نہیں تو کوئی بھی نہیں،کی سیاست اب نہیں چلے گی،لندن سے کراچی پہنچنے پرمیڈیا سے گفتگوکرتے ہوئے پیپلزپارٹی کے رہنما ڈاکٹرعاصم نے کہا کہ نواز شریف ملک کوبدنام کررہے ہیں، نوازشریف کی ڈگڈگی اوراداروں کے ساتھ کھلواڑہوتا دیکھ رہا ہوں، پاکستان پاکستانیوں کا ہے جس پرآنچ نہیں آنے دیں گے، عدلیہ اورفوج کے ساتھ جو جنگ کی جارہی ہے ہم اسے بھی دیکھ لیں گے اور ہم نہیں تو کوئی بھی نہیں کی سیاست نہیں چلے گی۔

(جاری ہے)

ڈاکٹرعاصم نے کہا کہ نوازشریف کواین آراو دینے کا فیصلہ پارلیمنٹ کرے گی، شریف برادران سعودیہ جا کر گناہوں کی معافی مانگیں گے تاکہ پھرعوام کو چونا لگا سکیں۔ انہوں نے کہا کہ فی الحال پیپلز پارٹی چھوڑنے کا کوئی ارادہ نہیں، آئندہ الیکشن پی پی پی بھاری اکثریت سے جیتے گی۔واضح رہے کہ ڈاکٹرعاصم کے خلاف اربوں روپے کی کرپشن اوردہشت گردوں کی سہولت کاری کے الزام ہیں تاہم اس وقت وہ ضمانت پرہیں جب کہ وہ علاج کے غرض سے لندن گئے تھے۔