دہشت گردی کے دن گنے جا چکے، 2018ء پاکستان کی ترقی اور خوشحالی کا سال ثابت ہوگا

سپیکر قومی اسمبلی سردار ایاز صادق کا سال نو کے موقع پر پیغام

پیر جنوری 11:20

اسلام آباد ۔ یکم جنوری (اُردو پوائنٹ اخبارتازہ ترین۔ 01 جنوری2018ء) سپیکر قومی اسمبلی سردار ایاز صادق نے نئے سال 2018ء کے آغاز پر ملک و قوم کے لئے نیک تمنائوں کا اظہار کرتے ہوئے کہا ہے کہ پاکستان ترقی اور جمہوری استحکام کے ایک نئے سال میں داخل ہو چکا ہے، 2018ء کا سورج پاکستان کی ترقی، عام آدمی کی خوشحالی اور جمہوریت کے استحکام کی نوید لے کر طلوع ہوا ہے۔

پیر کو نئے سال 2018ء کے آغاز پر اپنے پیغام میں انہوں نے کہاکہ نیا سال اس بات کاگواہ ہو گا کہ ہم تاریخ کے ایک صفحے کو پلٹ کر عصر حاضر کے چیلنجوںپر قابو پانے کے نئے عزم کے ساتھ ایک نئے سفر پر گامزن ہو گئے ہیں۔ انہوں نے کہاکہ پاکستان میں دہشت گردی کے دن گنے جا چکے ہیں اور 2018ء پاکستان کی ترقی اور خوشحالی کا سال ثابت ہوگا۔

(جاری ہے)

ملک کے دفاع، سالمیت اور سلامتی کے لئے مسلح افواج اور قانون نافذ کرنے والے اداروں کی خدمات اور قربانیاں لائق تحسین ہیں۔

پوری قوم شہداء کے خاندانوں کے ساتھ شانہ بشانہ کھڑی ہے۔ پاکستانی قوم مستقل مزاجی سے پیش قدمی کرتے ہوئے ملک کو درپیش چیلنجوں پر قابو پالے گی۔ انہوں نے پوری قوم سے اپیل کی کہ بابائے قوم قائد اعظم کے ایمان، اتحاد اور تنظیم کے زریں اصولوں پر متحد ہونے کی ضرورت ہے۔ نوجوان نسل اپنی مہارت اور صلاحیتوں کو بروئے کا لا کر ملک کو ترقی اور خوشحالی کے ایک نئے دور میں داخل کرنے کے لئے اپنا کردار ادا کرے۔ پاکستان ایک پر امن جنوبی ایشیا کے لئے پر عزم ہے اور خطے میں امن کے قیام کے لئے خطے کے دیگر ممالک سے اس سلسلہ میں تعاون جاری رکھے گا۔