Live Updates

چوہدری نثار تحریک انصاف میں آجائیں تو اچھا ہے،سیاست میں بعض اوقات دل بڑا کرنا پڑتا ہے،عمران خان

نواز شریف اور آصف زرداری بیرون ملک اپنے اربوں ڈالر واپس لے آئیں تو اٴْن کی توبہ قبول بلاول سے اتحاد کا مطلب آصف زرداری سے اتحاد ہے جو کہ ناممکن ہے،صحافیوں سے غیر رسمی گفتگو

اتوار 11 فروری 2018 23:30

اسلام آباد(اُردو پوائنٹ اخبارتازہ ترین - آن لائن۔ 11 فروری2018ء) چیئرمین پاکستان تحریک انصاف عمران خان نے کہاہے کہ اگر چوہدری نثار تحریک انصاف میں آجائیں تو اچھا ہے کیوں کہ سیاست میں بعض اوقات دل بڑا کرنا پڑتا ہے۔ صحافیوں سے غیر رسمی گفتگو کرتے ہوئے عمران خان کا کہنا تھا کہ نواز شریف اور آصف زرداری بیرون ملک اپنے اربوں ڈالر واپس لے آئیں تو اٴْن کی توبہ قبول ہے جب کہ بلاول سے اتحاد کا مطلب آصف زرداری سے اتحاد ہے جو کہ ناممکن ہے، اگر چوہدری نثار آزاد حیثیت سے الیکشن لڑیں تو ہوسکتا ہے اٴْن کی حمایت کریں اگر چوہدری نثار تحریک انصاف میں آجائیں تو اچھا ہے کیوں کہ سیاست میں بعض اوقات دل بڑا کرنا پڑتا ہے۔

اسمبلیوں سے مستعفی ہونے کی اطلاعات پر عمران خان کا کہنا تھا کہ اسمبلیوں سے باہر نکلنے کا سوچ رہے تھے، اچھا ہوا ہم اسمبلیوں سے نہیں نکلے، ہم نے 6 سینیٹرز کے ناموں کو حتمی شکل دے دی ہے، مولانا سمیع الحق ہمارے اتحادی ہیں، اضافی ووٹ ہوئے تو انہیں دے سکتے ہیں لیکن اقتدار میں آکر سینیٹ کا الیکشن براہ راست کرائیں گے۔

(جاری ہے)

چیئرمین تحریک انصاف نے کہا کہ لگ یہی رہا ہے کہ عام انتخابات وقت پر ہوں گے، نگران حکومت آتے ہی بہت سارے لوگ ن لیگ کو چھوڑ دیں گے پیپلز پارٹی اور (ن) لیگ چیئرمین سینیٹ کی نشست حاصل کرنے کے لیے پیسے لگا رہے ہیں جب کہ ایک شخص نے مجھے سینیٹ ٹکٹ کے لیے 40 کروڑ روپے کی آفر کی۔

سینیٹ الیکشن کے بعد آئندہ الیکشن کے لیے ٹکٹس جاری کریں گے۔عمران خان کا مزید کہنا تھا کہ خواجہ آصف قومی سلامتی کے لیے خطرہ ہیں، میری ججز سے درخواست ہے کہ خواجہ آصف کا کیس روزانہ کی بنیاد پر سنیں جب کہ خواجہ آصف کا اپنا گھر ٹھیک کرنے کا بیان قومی سلامتی پر حملہ ہے۔
Live پاکستان تحریک انصاف سے متعلق تازہ ترین معلومات