پاکستان پیپلز پارٹی کا آشیانہ ہائوسنگ سکینڈل پر پانامہ طرز کی جے آئی ٹی بنا کر تحقیقات کرنے کا مطالبہ

پیپلز پارٹی چاہتی ہے کہ قوم کو آشیانہ ہائوسنگ سکیم کے ذریعے کروڑوں غریب عوام کو لوٹنے کے منصوبے سے آگاہ کیا جائے، نئیر حسین بخاری

ہفتہ 24 فروری 2018 00:00

(آن لائن۔ تجزیہ نگار ۔ اکرام بخاری ) پاکستان پیپلز پارٹی نے آشیانہ ہائوسنگ سکینڈل کو پانامہ سکینڈل کے برابر کرپشن کا کیس قرار دیتے ہوئے پانامہ طرز کی جے آئی ٹی بنا کر سکینڈل کی تحقیقات کرنے کا مطالبہ کیا ہے۔ پاکستان پیپلز پارٹی پارلیمنٹیرین کے سیکرٹری جنرل اور سابق چیئر مین سینٹ نئیر حسین بخاری نے پارٹی کا مطالبہ بیان کرتے ہوئے کہا کہ پیپلز پارٹی چاہتی ہے کہ قوم کو آشیانہ ہائوسنگ سکیم کے ذریعے کروڑوں غریب عوام کو لوٹنے کے منصوبے سے آگاہ کیا جائے۔

(جاری ہے)

اس مقصد کے لئے پاناما طرز کی جے آئی ٹی بنائی جائے جس میںججز ، نیب حکام اور سرکاری تحقیقاتی اداروں کے ماہرین شامل کیے جائیں۔ نیئر بخاری نے کہا کہ قوم اور ملک کو لوٹنے والوں کا پیسہ باہر منتقل کرنے والوں کونشان عبرت بنایا جائے۔ انہوں نے کہا کہ ہمیں یقین ہے کہ آشیانہ ہائوسنگ سکیم کا لوٹا گیا پیسہ بھی منی لانڈرنگ کے ذریعے باہر منتقل کردیا گیا ہے۔ یہ سکینڈل بھی پانامہ سکینڈل جیسا ہے۔ اس لئے ضروری ہے کہ اس کی تحقیقات بھی پانامہ طرز کی جے آئی ٹی سے کروائی جائے۔