رہا ئشی علاقے میں سی آئی اے پولیس سنٹر کی تعمیر کیخلاف لاہور ہائیکورٹ میں درخواست دائر

منگل 13 مارچ 2018 19:34

لاہور۔13 مارچ(اُردو پوائنٹ اخبارتازہ ترین - اے پی پی۔ 13 مارچ2018ء) لاہور ہائیکورٹ میں رہا ئشی علاقے میں سی آئی اے پولیس سنٹر کی تعمیر کیخلاف درخواست دائر کر دی گئی،یہ درخواست پرانی انارکلی کے رہائشیوں نے ایڈووکیٹ اظہر صدیق کے توسط سے دائر کی ہے،درخواست میں کہا گیا ہے کہ لاہور کے ربانی روڈ پر سی آئی اے سنٹر کو غیر قانونی طور پرتعمیر کیاجا رہا ہے،سی آئی اے پولیس سنٹر کی تعمیر سے مقامی رہائشیوں کی زندگیاں خطرے میں ہیں،رہائشی علاقوں میں قانون نافذ کرنیوالے اداروں پر پہلے بھی دہشتگردی کے حملے ہو چکے ہیں،سی آئی اے سنٹر پر حملہ ہوا تو ملحقہ علاقوں کے رہائشی متاثر ہونگے ،علاقے میں آئی جی پولیس پنجاب آفس کی وجہ سے پہلے ہی رہائشی مشکلات کا شکار ہیں،آئی جی آفس کے اردگرد رکاوٹوں کے باعث اور سکیورٹی خدشات کی وجہ سے شہری پہلے ہی خوفزدہ رہتے ہیں،درخواست میں استدعا کی گئی ہے کہ عدالت شہریوں کے جان و مال اور بنیادی حقوق کے تحفظ کو یقینی بنانے کیلئے سی آئی اے سنٹر کی تعمیر روکنے کے احکامات صادر کرے۔