Live Updates

میری جنگ آصف زرداری اور نوازشریف سے نہیں ،کرپٹ ٹولے کیخلاف ہے،عمران خان

ملک کو قرضوں کے دلدل میں دبا دیا گیا ہے، چھوٹا طبقہ امیر اور عوام مقروض ہورہی ہے، دنیا میں پیٹرول کی قیمتیں کم یہاں اوپر جارہی ہے،چوری کوئی کررہا ہے ،قیمت عوام ادا کرتے ہیں،جب تک زندہ ہوں کرپٹ ٹولے کیخلاف جنگ کرتا رہوں گا، جہلم میں کارکنوں سے خطاب

بدھ 14 مارچ 2018 19:44

میری جنگ آصف زرداری اور نوازشریف سے نہیں ،کرپٹ ٹولے کیخلاف ہے،عمران ..
جہلم (اُردو پوائنٹ اخبارتازہ ترین - این این آئی۔ 14 مارچ2018ء) چیئرمین تحریک انصاف عمران خان نے کہا کہ میری جنگ آصف زرداری اور نوازشریف سے نہیں ،کرپٹ ٹولے کیخلاف ہے،ملک کو قرضوں کے دلدل میں دبا دیا گیا ہے، چھوٹا طبقہ امیر اور عوام مقروض ہورہی ہے، دنیا میں پیٹرول کی قیمتیں کم یہاں اوپر جارہی ہے،چوری کوئی کررہا ہے ،قیمت عوام ادا کرتے ہیں،جب تک زندہ ہوں کرپٹ ٹولے کیخلاف جنگ کرتا رہوں گا۔

بدھ کو جہلم میں کارکنوں سے خطاب کرتے ہوئے چیئرمین تحریک انصاف عمران خان نے کہا کہ میری آصف زرداری اور نوازشریف سے ذاتی جنگ نہیں ہے بلکہ ہماری جنگ کرپٹ ٹولے کیخلاف ہے۔انہوں نے کہا کہ 9 سال پہلے ہر پاکستانی پر 35 ہزار روپے قرضہ تھا، پھر ان 9 سالوں میں آصف زرداری اور نوازشریف کا دور آیا جس کے بعد ہر پاکستانی ایک لاکھ 30 ہزار روپے کا مقروض ہے۔

(جاری ہے)

انہوں نے کہا کہ ملک کو قرضوں کے دلدل میں دبا دیا گیا ہے، چھوٹا طبقہ امیر اور عوام مقروض ہورہی ہے، اوپر بیٹھے لوگ ملک کا پیسہ چوری کرکے باہر لے جاتے ہیں۔ انہوں نے کہا کہ دنیا میں پیٹرول کی قیمتیں کم ہے لیکن یہاں اوپر جارہی ہے۔ انہوں نے کہا کہ چوری کوئی کررہا ہے اور قیمت مہنگائی کے ذریعے عوام ادا کرتے ہیں۔انہوں نے کہا کہ میں جب تک زندہ ہوں کرپٹ ٹولے کیخلاف جنگ کرتا رہوں گا۔

انہوں نے کہا کہ ہم 2018 میں ہم یہ جنگ جیت کر دکھائینگے۔انہوں نے کہا کہ ملک کا سارا پیسہ لوٹ کر نواز شریف ملک کا خاندان اور بچے ارب پتی ہوگئے ہیں۔انہوں نے کہا کہ بچوں کوروشن مستقبل تب ملے گا جب انہیں اچھی تعلیم اورخوراک دیں گے۔ انہوں نے کہا کہ جوپاکستان ہم چاہتے ہیں اس میں عام گھرانے سے بچہ سرکاری سکول سے پڑھ کر بڑے عہدے پر پہنچ سکے گا۔

انہوں نے کہا کہ جب قوم کا پیسہ چوری ہو کر باہر جاتا ہے تو پانی اور روزگار نہیں ملتا۔انہوں نے کہا کہ نواز شریف کے بعد اب شہباز شریف کی باری ہے، نوازشریف کا تو کیوں نکالا ہوگیاہے ، اب چھوٹے میاں صاحب ’جونیئر ڈان ‘باری لینے آیا ہے۔انہوں نے کہا کہ نوازشریف سمجھتے ہیں ڈرامہ کرکے قوم کو دھوکہ دیں گے، حبیب جالب کے شعر پڑھ کر انقلاب کی بات کریں گے، لیکن اب ایسا نہیں ہوگا ۔ عمران خان کے خطاب کے فوری بعد پی ٹی آئی کے کارکنان آپس میں لڑ پڑے۔واضح رہے اس سے قبل گزشتہ روز بھی عمران خان کے خطاب کے بعد تحریک انصاف کے کارکن آپ میں لڑ پڑے تھے ۔
Live عمران خان سے متعلق تازہ ترین معلومات