پاکستان نے خوشی کے عالمی انڈیکس میں بھارت پر برتری حاصل کر لی

افغانستان کو چھوڑ کر جنوبی ایشیا میں بھارت خوشی کے انڈیکس میں سب سے پیچھے ہے،اقوام متحدہ

جمعرات 15 مارچ 2018 20:04

پاکستان نے خوشی کے عالمی انڈیکس میں بھارت پر برتری حاصل کر لی

نیویا رک(اُردو پوائنٹ اخبارتازہ ترین - آن لائن۔ 15 مارچ2018ء) انسانی مسرت اور خوشی کی عالمی درجہ بندی میں اس سال پاکستان نے بھارت کو اٹھاون درجے پیچھے چھوڑ دیا ہی. اقوام متحدہ کے جاری کردہ خوشی کے عالمی انڈیکس میں پاکستان 75 ویں پوزیشن اور بھارت 133 ویں پوزیشن پر آیا ہے۔

(جاری ہے)

دو ہزار اٹھارہ کے خوشی کے انڈیکس میں سارک ممالک میں سے پاکستان پچھلے سال کے مقابلے میں 5 درجے بہتری کے ساتھ 75 ویں پوزیشن پر ہے جبکہ بھوٹان 97، نیپال 101 ، بنگلہ دیش 115، سری لنکا 116، بھارت 133 اور افغانستان 145 ویں درجے پر آیا ہے یعنی افغانستان کو چھوڑ کر جنوبی ایشیا میں بھارت سب سے پیچھے ہے۔

اقوام متحدہ کے 2018 کے خوشی کے انڈیکس میں 156 ممالک کا فی کس آمدنی، سماجی سپورٹ، صحت مند زندگی، سماجی آزادی، فراخ دِلی اور شفافیت جیسے شعبوں میں جائزہ لیا گیا۔اس سالانہ سروے میں فن لینڈ کو دنیا کا سب سے خوش ملک پایا گیا جبکہ امریکی باشندوں میں زیادہ کمانے کے باوجود خوشی کم ہوتی جا رہی ہے،اس سال امریکہ 14 سے گر کر 18 ویں نمبر پر اور برطانیہ 19 ویں نمبر پر ہے۔