لاہور چیمبر کے مطالبے پر چین سے ایف ٹی اے کا دوسرا مرحلہ مئو خر، سٹیل پر ریگولیٹری ڈیوٹی ختم کی جارہی ہے، وفاقی وزیر تجارت محمدپرویز ملک

لاہور۔4 اپریل(اُردو پوائنٹ اخبارتازہ ترین - اے پی پی۔ 04 اپریل2018ء) وفاقی وزیر تجارت و ٹیکسٹائل محمدپرویز ملک نے کہا ہے کہ سٹیل پر ریگولیٹری ڈیوٹی جلد ختم کردی جائے گی جبکہ لاہور چیمبر کے مطالبے پر چین سے فری ٹریڈ ایگریمنٹ کا دوسرا مرحلہ موخر کردیا گیا ہے۔ لاہور چیمبر کے صدر ملک طاہر جاوید سے ایک خصوصی ملاقات میں وفاقی وزیر نے کہا کہ کاروباری برادری کے مسائل حل کرناحکومت کی اوّلین ترجیح ہے، ملک کی برآمدات کو بڑھانے کے لیے ٹھوس اقدامات اٹھائے جارہے ہیں جن کے اچھے نتائج برآمد ہورہے ہیں۔

اس موقع پر سیکریٹری کامرس جاوید ،ڈی جی ٹریڈ پالیسی محمد اشرف اور لاہور چیمبر کے سیکریٹری جنرل شاہد خلیل بھی موجود تھے۔ پرویز ملک نے کہا کہ پاکستانی مصنوعات کے لیے نئی منڈیوں پر خصوصی توجہ دی جارہی ہے، معاشی استحکام کے لیے کاروباری برادری کا کردار بہت اہم ہے، تاجر برآمدات کے فروغ کی راہ میں حائل رکاوٹوں کی نشاندہی کریں اور ویلیوایڈیشن و برانڈنگ پر خاص توجہ دیں۔

(جاری ہے)

لاہور چیمبر کے صدر ملک طاہر جاوید نے کہا کہ ویلیوایڈیشن میں حکومت کاروباری برادری کی مدد اورٹیکنالوجی فراہم کرے، اس سے عالمی منڈی میں پاکستانی مصنوعات کی قدر بڑھے گی۔ ملک طاہر جاوید نے کہا کہ محدود برآمدات کی ایک بڑی وجہ چند ممالک پر انحصار بھی ہے، نئی منڈیوں تک رسائی حاصل کیے بغیر برآمدات کو فروغ دینا ممکن نہیں ہے۔ انہوں نے کہا کہ پاکستان کو افریقہ، لاطینی امریکہ، وسطی ایشیائی ریاستوں، روس اور آسٹریلیا وغیرہ کے ساتھ ترجیحی تجارت کے ایسے معاہدے کرنے چاہئیں جو ان ممالک کو پاکستانی برآمدات بڑھانے میں مددگار ثابت ہوں۔

ملک طاہر جاوید نے مزید کہا کہ حکومت عالمی معیارات سے ہم آہنگی میں کاروباری برادری کی مدد کرے نیز اس سلسلے میں ٹھوس اقدامات اٹھائے جائیں۔