سپریم کورٹ نے نئے ٹور آپریٹرز کو حج کوٹہ دینے سے متعلق دائردرخواست خارج کردی

جمعرات 12 اپریل 2018 23:57

اسلام آباد ۔ (اُردو پوائنٹ اخبارتازہ ترین - اے پی پی۔ 12 اپریل2018ء) سپریم کورٹ نے نئے ٹور آپریٹرز کو حج کوٹہ دینے سے متعلق دائردرخواست خارج کرتے ہوئے واضح کیاہے کہ سارے ٹریول ایجنٹ یہاں آجاتے ہیں لیکن اس موقع پرعدالت کوئی بھی ایکشن نہیں لے سکتی۔ جمعرات کو چیف جسٹس میاں ثاقب نثار کی سربراہی میں تین رکنی بینچ نے مختلف نئے ٹورآپریٹرز کی جانب سے کوٹہ دلانے کیلئے دائر درخواست کی سماعت کی۔

(جاری ہے)

اس موقع پرچیف جسٹس نے کہا کہ حج کوٹہ کے لئے سارے ٹریول ایجنٹ یہاں آجاتے ہیں، حالانکہ اس وقت ہم کوئی ایکشن لینے کو تیار نہیں، ایسے مقدمات سپریم کورٹ میں نہیں آنے چاہیئے، اگرآئندہ اس طرح کے مقدمات سپریم کورٹ میں لائے گئے تو درخواست گزار کو دو لاکھ روپے جرمانہ کیا جائے گا، حج ایک مقدس فریضہ ہے اس کی انجام دہی کاعمل مکمل ہونے دیا جائے۔ بعدازاں عدالت نے درخواست غیر سنجیدہ قرار دیتے ہوئے خارج کردی۔