تحریک انصاف نے نواز شریف کی بیرون ملک روانگی کی مخالفت کردی ، تشویش کا اظہار

اہلیہ کی عیادت نواز شریف کے فرار کا بہانہ نہیں بننی چاہئے، ایسے میں نواز شریف کی بیرون ملک روانگی بہت سے شبہات کو جنم دے رہی ہے، ترجمان پی ٹی آئی فواد چوہدری کاردعمل

بدھ اپریل 12:09

تحریک انصاف نے نواز شریف کی بیرون ملک روانگی کی مخالفت کردی ، تشویش ..
اسلام آباد(اُردو پوائنٹ اخبارتازہ ترین۔ 18 اپریل2018ء) تحریک انصاف نے نواز شریف کی بیرون ملک روانگی کی مخالفت کرتے ہوئے کہا ہے کہ اہلیہ کی عیادت فرار کا بہانہ نہیں بننی چاہئے۔ترجمان تحریک انصاف فواد چوہدری نے نواز شریف کی لندن روانگی پر تشویش کا اظہار کرتے ہوئے نیب ریفرنسز میں احتساب عدالت کی کارروائی فیصلہ کن مراحل میں داخل ہوا چاہتی ہے، ایسے میں نواز شریف کی بیرون ملک روانگی بہت سے شبہات کو جنم دے رہی ہے، اہلیہ کی عیادت فرار کا وسیلہ نہیں بننی چاہئے ۔

فواد چوہدری نے اسحاق ڈار کی طرف اشارہ کرتے ہوئے کہا کہ سمدھی صاحب بھی بیماری کی آڑ میں نو دو گیارہ ہوئے، وزیراعظم اور وزیر داخلہ سمیت وفاقی حکومت اور اسکے بیشتر ادارے شریفوں کو بچانے یا بھگانے میں لگے ہوئے ہیں۔

(جاری ہے)

فواد چوہدری کا کہنا تھا کہ نواز شریف کی لندن یاترا کا منصوبہ اس وقت سامنے آیا جب مودی لندن پہنچے، آنے والا وقت بتائے گا کہ نواز شریف کا مودی کے دورہ برطانیہ سے کیا تعلق ہے ، احتساب سے فرار کی ممکنہ کوششوں کے پیش نظر مناسب اقدامات ضروری ہیں۔

واضح رہے کہ سابق وزیراعظم نواز شریف،، بیٹی مریم نواز، داماد کیپٹن ریٹائرڈ صفدر اور نواسی ماہ نور لندن روانہ ہوگئے ہیں۔ نواز شریف لندن میں اپنی اہلیہ بیگم کلثوم نواز کی عیادت کریں گے اور ممکنہ طور پر 22 اپریل اتوار کو واپس آئیں گے۔