ورلڈ الیون اور کالی آندھی کے درمیان چیریٹی میچ 31مئی کو انگلینڈ میں کھیلا جائیگا

شاہد آفریدی اور شعیب ملک ویسٹ انڈیز کے خلاف شیڈول ٹی ٹونٹی چیریٹی میچ میں آئی سی سی ورلڈ الیون کی نمائندگی کریں گے

ہفتہ 21 اپریل 2018 16:17

لندن(اُردو پوائنٹ اخبارتازہ ترین - آن لائن۔ 21 اپریل2018ء) پاکستانی کرکٹرز شاہد خان آفریدی اور شعیب ملک آئندہ ماہ ویسٹ انڈیز کے خلاف شیڈول ٹی ٹونٹی چیریٹی ٹی ٹونٹی انٹرنیشنل کرکٹ میچ میں آئی سی سی ریسٹ آف ورلڈ الیون کی نمائندگی کریں گے۔

(جاری ہے)

ورلڈ الیون اور کالی آندھی کے درمیان چیریٹی میچ 31مئی کو لارڈز کے تاریخی گرائونڈ میں شیڈول ہے، انگلینڈ کے ایوان مورگن ورلڈ الیون کی قیادت کریں گے، انٹرنیشنل کرکٹ کونسل، انگلینڈ اینڈ ویلز کرکٹ بورڈ اور میلبرن کرکٹ کمیٹی نے گزشتہ برس ویسٹ انڈیز میں سمندری طوفانوں سے تباہ ہونے والے پانچ سٹیڈیم کی تعمیر نو کیلئے فنڈز اکٹھا کرنے کی غرض سے چیریٹی میچ کے انعقاد کا فیصلہ کیا تھا۔

آئی سی سی نے ویسٹ انڈیز کے خلاف شیڈول میچ کیلئے فرسٹ گروپ آف پلیئرز کا اعلان کر دیا ہے جن میں شاہد آفریدی، شعیب ملک اور سری لنکا کے تھسارا پریرا شامل ہیں، بقیہ سکواڈ کا اعلان آئندہ ہفتوں میں کیا جائے گا، آفریدی نے مارچ 2016 میں آخری ٹی ٹونٹی انٹرنیشنل میچ کھیلا تھا اور اب وہ تھوڑی دیر کیلئے دوبارہ انٹرنیشنل کرکٹ میں کم بیک کریں گے۔۔