ملیریا سے بچائوکا عالمی دن پرسوں منایا جائیگا

پیر اپریل 13:56

ملیریا سے بچائوکا عالمی دن پرسوں منایا جائیگا
فیصل آباد۔23 اپریل(اُردو پوائنٹ اخبارتازہ ترین۔ 23 اپریل2018ء) پاکستان سمیت دنیا بھر میں ملیریا سے بچائوکا عالمی دن پرسوں بدھ کو منایاجائیگا اس مرتبہ اس دن کا تھیم’’ریڈی ٹو بیٹ ملیریا‘‘(ملیریا کو شکست دینے کے لئے تیار) ہے۔عالمی ادارہ صحت کی ملیریا سے متعلق گذشتہ سال کی سالانہ رپورٹ کے مطابق دنیا بھر میں گزشتہ سال ملیریا کے 216 ملین کیس رجسٹرڈ ہوئے جو کہ 2016 کے مقابلے میں 5 ملین زیادہ ہیںِ جبکہ اس سی445 000 افراد موت کی منہ میں چلے گئے۔

محکمہ صحت پنجاب کے پبلک ہیلتھ سپیشلسٹ ڈاکٹر افتخار احمد نور نے بتا یا کہ دنیا میں ہر سال 500ملین افراد ملیریا کے مرض میں مبتلا ہوتے ہیں جن میں غریب ترین لوگوں کی تعداد 70فیصد کے قریب ہے ۔اس طرح ترقی پذیر ممالک خصوصاً ایشیا کے ممالک کیلئے ملیریا ایک بڑھتا ہوا خطرہ ہے نیز ہر سال دنیا بھر میں ملیریا سے 10لاکھ افراد اور پاکستان میں 50 ہزار افراد کی ہلاکت بھی لمحہ فکریہ ہے۔

(جاری ہے)

انہوں نے بتایا کہ دنیا میں ہر30 سیکنڈ کے بعد ایک بچہ ملیریا کے باعث لقمہ اجل بن جاتا ہے۔ اس موقع پر محکمہ صحت ، اسلامک میڈیکل ایسوسی ایشن ، پاکستان میڈیکل ایسوسی ایشن ، اینٹی ملیریل ایسوسی ایشن اور کالج آف پیرا میڈکس کے زیر اہتمام ملیریا کے عالمی دن کے حوالے سے خصوصی کانفرنسز ، ورکشاپس، سیمینارز کا بھی انعقاد کیاجائیگا جس سے محکمہ صحت کے افسران، ماہرین طب سمیت مختلف مکاتب فکر کی اہم شخصیات بھی خطاب کریں گی نیز ملیریا کے پھیلائو کی وجوہات، ابتدائی علامات ، تشخیص اور علاج و تدارکی اقدامات اور پرہیز کے بارے میں تفصیلی روشنی ڈالی جائیگی تاکہ عوام الناس کو ملیریا سے بچانا ممکن ہو سکے۔

ورلڈ ملیریا ڈے کے موقع پر الیکٹرانک میڈیا خصوصی پروگرامات نشر کرے گا جبکہ پرنٹ میڈیا میں بھی خاص مضامین کی اشاعتوں کا اہتمام کیا جائیگا۔