ثمینہ فاضل کی قیادت میں تجارت سے وابستہ خواتین کا 9 رکنی وفد بین الاقوامی نمائش میں شرکت کے لئے چین روانہ

منگل اپریل 12:19

ثمینہ فاضل کی قیادت میں تجارت سے وابستہ خواتین کا 9 رکنی وفد بین الاقوامی ..
اسلام آباد ۔ (اُردو پوائنٹ اخبارتازہ ترین۔ 24 اپریل2018ء) اسلام آباد ویمن چیمبر کی بانی صدرثمینہ فاضل کی قیادت میں تجارت سے وابستہ خواتین کا 9 رکنی وفد چین میں منعقدہ ایک بین الاقوامی نمائش میں شرکت کے لئے منگل کو روانہ ہو گیا۔ چین کے مختلف شہروں میں12 روز قیام کے دوران وفد مختلف چیمبروں و کاروباری تنظیموں، اعلیٰ حکام اور اہم کاروباری شخصیات سے ملاقاتیںکرے گا اور سرمایہ کاری وجوائنٹ وینچرز کے امکانات کا جائزہ لے گا۔

وفد کی سربراہ اور اسلام آباد ویمن چیمبر کی بانی صدر ثمینہ فاضل نے روانگی سے قبل بینظیر بھٹو ائیرپورٹ پر میڈیا سے بات چیت کرتے ہوئے کہا کہ وفد گارمنٹس، تعلیم و تربیت، ٹیکسٹائل، جیولری،، کاسمیٹکس، اشیائے خورد و نوش اور صحت کے شعبہ میں کاروبار کے امکانات کا جائزہ لے گا۔

(جاری ہے)

وفد 1957ء سے کینٹن میں منعقد ہونے والے تجارتی میلے میں بھرپور شرکت کرے گا جبکہ دیگر شہروں کا دورہ بھی کرکے فارماسیوٹیکلز،کاسمیٹکس انڈسٹری، نیچرل بیوٹی پراڈکٹس بنانے والی کمپنیاں، پیکجنگ، مشینری ،خام مال کے سپلائیرز،امپورٹرز، ایکسپورٹرز،ڈسٹری بیوٹرزسے ملاقاتیں کی جائیں گی تاکہ مقامی مصنوعات وہاں اور ان کی مصنوعات پاکستان میں متعارف کروائی جا سکیں جس سے دونوں برادر ممالک کے مابین قربت مزید بڑھے گی۔

انہوں نے کہا کہ چینی معیشت تیز رفتار ترقی کے عمل سے نکل کر کوالٹی کی پیداوار کی طرف گامزن ہو چکی ہے جس کا جائزہ لیا جائے گا جبکہ سی پیک کے متعلق بھی بات چیت کی جائے گی۔ انہوں نے بتایا کہ گزشتہ سال بھی ویمن چیمبر کے وفد نے چین کا کامیاب دورہ کیا تھا جس کی کامیابی سے ان کا حوصلہ بڑھا ہے۔ وفد میں فائزہ عباس، مسرت جبین، صائقہ بتول، شمیم اختر، فرزانہ کوثر اور دیگر شامل ہیں۔