خودکش حملوں کی تحقیقات کے لئے فرانزک ٹیم کل کوئٹہ پہنچے گی،عبدالرزاق چیمہ

سی ٹی ڈی کی جانب سے قائم کی گئی تحقیقاتی ٹیم مختلف پہلوئوں کی روشنی میں تفتیش کے عمل کو آگے بڑھا رہی ہے،آئی جی کوئٹہ

بدھ 25 اپریل 2018 21:24

کوئٹہ (اُردو پوائنٹ اخبارتازہ ترین - آن لائن۔ 25 اپریل2018ء) ریجنل پولیس آفیسر وڈپٹی انسپکٹر جنرل پولیس کوئٹہ عبدالرزاق چیمہ نے کہا ہے کہ گزشتہ روز ہونیوالے خودکش حملوں کی تحقیقات کے لئے فرانزک ٹیم کل کوئٹہ پہنچے گی جبکہ سی ٹی ڈی کی جانب سے قائم کی گئی تحقیقاتی ٹیم مختلف پہلوئوں کی روشنی میں تفتیش کے عمل کو آگے بڑھا رہی ہے ’’ آن لائن‘‘ سے خصوصی گفتگو کر تے ہوئے ڈی آئی جی کوئٹہ عبدالزاق چیمہ نے بتایا کہ گزشتہ روز کوئٹہ میں ہونیوالے خودکش حملوں کی تحقیقات کے لئے سی ٹی ڈی کی تحقیقاتی ٹیم کام کر رہی ہے اور جائے وقوعہ سے ملنے والے شواہد کی روشنی میں تحقیقاتی عمل میں آگے بڑھا رہے ہیں ہماری کوشش ہے کہ جائے وقوعہ سے ملنے والے شواہد کی روشنی میں تمام پہلوئوں کو مد نظر رکھتے ہوئے تحقیقاتی عمل میں آگے بڑھایا جائے جس کے لئے ٹیمیں کام کر رہی ہے اور ایک سوال کے جواب میں انہوں نے کہا ہے کہ جائے وقوعہ اور کرائم سین کو محفوظ رکھا گیا ہے جس کی تحقیقات کے لئے آج دو رکنی فرانزک ٹیم کوئٹہ پہنچ رہی ہے جو جائے وقوعہ کا دورہ کر کے وہاں سے شواہد اکٹھے کرے گی جس کی روشنی میں تحقیقاتی عمل میں آگے بڑھایا جائیگا ۔