میں گلیمرس ہیروئن نہیں ہوں، کترینہ کیف

جمعرات اپریل 12:13

میں گلیمرس ہیروئن نہیں ہوں، کترینہ کیف
ممبئی (اُردو پوائنٹ اخبارتازہ ترین۔ 26 اپریل2018ء) جہاں کترینہ کیف حال ہی میں سلمان خان کے ساتھ ’ٹائیگرزندہ ہے‘ میں نظر آئی تھیں، وہیں وہ آنے والی فلم ’زیرو‘ میں شاہ رخ جب کہ ’ٹھگس آف ہندوستان‘ میں عامر خان کے ساتھ ایکشن میں نظر آئیں گی۔ساتھ ہی کترینہ کیف جلد ہی ورون دھون کے ساتھ پہلی بار ڈانس فلم میں بھی رقص کرتی نظر آئیں گی۔اگرچہ کترینہ کیف’چکنی چمیلی‘ جیسے آئٹم گانوں پر بھی پرفارم کر چکی ہیں، تاہم وہ خود کو گلیمرس ہیروئن نہیں سمجھتیں۔

اپنے ایک انٹرویو میں کترینہ کیف نے اس بات پر غصے کا اظہار کیا کہ لوگ چند فلموں اور پرفارمنس کی بنیاد پر شخصیات پر لیبل لگالیتے ہیں۔کترینہ کیف نے خود کو گلیمرس ہیروئن سمجھنے کے حوالے سے پوچھے گئے جواب میں کہا کہ وہ خود کو گلیمرس نہیں سمجھتیں اور نہ ہی وہ چاہتی ہیں کہ کسی کی شخصیت کو محدود الفاظ میں قید کیا جائے۔

(جاری ہے)

بار بی ڈول نے وضاحت کی کہ انہوں نے ’راج نیتی، زندگی نہ ملے گی دوبارہ، عجب پریم کی غضب کہانی اور نیو یارک‘ جیسی فلموں میں کام کیا ہے، پھر بھی انہیں گلیمرس ہیروئن کیوں سمجھا جاتا ہے۔

انہوں نے اس بات پر بھی شدید برہمی کا اظہار کیا کہ لوگ کسی کی شخصیت کو اس کا مکمل کام دیکھے بغیر محدود الفاظ میں قید کردیتے ہیں۔ایک اور سوال کے جواب میں ان کا کہنا تھا کہ وہ اس حوالے سے خود کو خوش قسمت سمجھتی ہیں کہ انہوں نے بولی وڈ کے تینوں خانز کے ساتھ کام کیا۔کترینہ کیف نے آنے والی ڈانس فلم ’اے بی سی ڈی 3‘ میں پہلی بار ورون دھون کے ساتھ کام کرنے کو اپنے لیے اچھا موقع قرار دیتے ہوئے کہا کہ وہ اس فلم میں کام کرنے کے لیے بہت پرجوش ہیں۔

اپنی چھوٹی بہن ایزابیل کیف کے فلمی کیریئر کے حوالے سے بات کرتے ہوئے انہوں نے کہا کہ انہوں نے اپنی بہن کی اس حوالے سے کوئی مدد نہیں کی، تاہم وہ انہیں مشورے دیتی رہتی ہیں۔خیال رہے کہ ان کی بہن ایزابیل کیف کے حوالے سے اطلاعات ہیں کہ وہ بھی فلمی کیریئر کی شروعات ایک ڈانس فلم سے کریں گی۔اطلاعات ہیں کہ کترینہ کیف کی بہن سلمان خان کی پروڈکشن کمپنی کے تحت بننے والی فلم ’ٹائم ٹو ڈانس‘ میں سورج پنچولی کے ساتھ کام کرتی نظر آئیں گی۔