مسلم لیگ (ن) کی حکومت کے ہاتھ غریب عوام کے خون سے رنگے ہوئے ہیں ‘راجہ قیصر کا قتل ریاستی دہشتگردی ہے

تحریک انصاف کے رہنمائوں سردار قاضی محمد اسرائیل، فیض عالم خان، رانا اخلاق احمد خان، خواجہ نواز، آصف خان کا بیان

جمعہ 27 اپریل 2018 19:47

آٹھ مقام(اُردو پوائنٹ اخبارتازہ ترین - آئی این پی۔ 27 اپریل2018ء) پاکستان تحریک انصاف کے رہنمائوں سردار قاضی محمد اسرائیل، فیض عالم خان، رانا اخلاق احمد خان، خواجہ نواز، آصف خان نے کہا ہے کہ مسلم لیگ ن کی حکومت کے ہاتھ غریب عوام کے خون سے رنگے ہوئے ہیں راجہ قیصر کا قتل ریاستی دہشت گردی ہے۔ چراخ بیگوں نے سیاسی مخالفین کو دبانے کے لئے اوچھے ہتھکنڈے استعمال کر رہے ہیں۔

راولا کوٹ میں نعیم بٹ کے قتل کے بعد دارلحکومت مظفرآباد میں طالب علم رہنماہ راجہ قیصر کا قتل بدترین درندگی کی مثال ہے۔ چوبیس گھنٹے گزرنے کے باوجود قاتل گرفتار نہیں ہوسکے ہیں۔ مسلم لیگ ن آزاد کشمیر قاتلوں کی سرپرستی کر رہی ہے۔ حکومتی دہشت گردی کی پاکستان تحریک انصاف شدید مذمت کرتی ہے۔

(جاری ہے)

چیف سیکرٹری۔ آئی جی پولیس نے قاتلوں کی گرفتاری کے احکامات صادر نہ کئے تو پی ٹی آئی ریاست بھر میں پہیہ جام ہڑتال کی کال دے گی۔

انھوں نے کہا کہ قاتلوں کی گرفتاری عمل میں نہ آئی تو تحریک انصاف فریق بنتے ہوئے وزیراعظم سمیت ذمہ داروں کے خلاف ایف آئی آر درج کروائی جائے گی۔ ان کی جماعت سوگوار خاندان کے ساتھ نہ صرف تعزیت کرتی ہے بلکہ ان کو انصاف دلانے اور قاتلوں کو کیفر کردار تک پہنچانے کے لئے ان کے ساتھ کھڑی ہے۔ تحریک انصاف دہشت گردی غنڈہ گردی کی کسی کو بھی اجازت نہیں دے گی معصوم لوگوں کا قتل ن لیگ اپنی ڈوبتی کشتی کو بچانے کے لئے انسانی جانوں سے کھیل رہی ہے۔ لیکن قاتلوں کو پھانسی کے گھاٹ تل پہنچا کر دم لیں گے۔