کاروباری سرگرمیوں میں وسعت کی وجہ سے لوگوں کیلئے روزگار اور کاروبار کے نئے مواقع پیدا ہورہے ہیں‘رفیق رجوانہ

حکومت تاجروں کے مسائل سے بخوبی آگاہ ہے ، ایسے اقدامات اٹھائے جارہے ہیں جن سے انہیں زیادہ سے زیادہ ریلیف حاصل ہو ، گورنر پنجاب

جمعہ 27 اپریل 2018 21:29

کاروباری سرگرمیوں میں وسعت کی وجہ سے لوگوں کیلئے روزگار اور کاروبار ..

لاہور(اُردو پوائنٹ اخبارتازہ ترین - این این آئی۔ 27 اپریل2018ء) گورنر پنجاب ملک محمد رفیق رجوانہ سے گورنر ہائوس لاہور میںمسلم لیگ(ن) تاجر ونگ کے سینئر نائب صدر ارجمند مقصود بٹ کی قیادت میں تاجروں کے وفد نے ملاقات کی۔ ملاقات میں وفد نے گورنر پنجاب کو انہیں درپیش مختلف مسائل سے آگاہ کیا۔ گورنر پنجاب نے کہا کہ تاجر قومی معیشت میں اہم کردار ادا کررہے ہیں اور کاروباری سرگرمیوں میں وسعت کی وجہ سے لوگوں کے لئے روزگار اور کاروبار کے نئے مواقع پیدا ہورہے ہیں۔

(جاری ہے)

انہوں نے کہا کہ تاجر اور صنعت کار کسی بھی ملک کی معیشت میں ریڑھ کی ہڈی کی حیثیت رکھتے ہیں اور پنجاب حکومت نے ہمیشہ تاجروں کے مسائل کو ترجیحی بنیادوں پر حل کیا ہے تاکہ ملکی اکانومی مضبوط ہو۔انہوں نے کہا کہ تاجر برادری جس استقامت سے مشکل ترین حالات میں ملک کے کاروبار کو رواں دواں رکھے ہوئے ہے قابل ستائش ہے۔ گورنر پنجاب نے کہا کہ قومی سوچ اپنانے سے مسائل باآسانی حل ہو سکتے ہیں۔ انہوں نے کہا کہ حکومت تاجروں کے مسائل سے بخوبی آگاہ ہے اور ایسے اقدامات اٹھائے جارہے ہیں جن سے انہیں زیادہ سے زیادہ ریلیف حاصل ہو اور سہولیات میں اضافہ ہو سکے۔