پاکستان بیت المال کے ویمن ایمپاورمنٹ سنٹر سٹی ٹو سے 6 ماہ کا کورس مکمل کرنے والی خواتین میں اسناد تقسیم کی گئیں

ہفتہ 28 اپریل 2018 13:10

ہری پور۔ (اُردو پوائنٹ اخبارتازہ ترین - اے پی پی۔ 28 اپریل2018ء) پاکستان بیت المال ہری پور کے ویمن ایمپاورمنٹ سنٹر سٹی ٹو سے 6 ماہ کا کورس مکمل کرنے والی خواتین میں اسناد تقسیم کی گئیں۔ اس حوالہ سے ٹی ایم اے ہال ہری پور میں ایک خصوصی تقریب کا انعقاد کیا گیا جس کی مہمان خصوصی خاتون پولیس آفیسر شہزادی نوشاد گیلانی تھیں۔ اس موقع پر تحصیل ناظم طارق خان، ڈسٹرکٹ کمیشن آن سٹیٹس فار ویمن کی چیئرپرسن ساجدہ حسرت خان، تحریک انصاف ویمن ونگ کی ضلعی صدر روبینہ شاہین، نزہت فاطمہ سمیت دیگر شخصیات موجود تھیں۔

قبل ازیں پاکستان بیت المال کے ضلعی آفیسر نیئر عباس جعفری نے سنٹر کے بارے میں تفصیلی رپورٹ پیش کی جس کے بعد مہمانان گرامی نے کورس مکمل کرنے والی خواتین میں سرٹیفکیٹس اور گفٹ تقسیم کئے۔

(جاری ہے)

اس موقع پر اپنے خطاب میں شہزادی نوشاد گیلانی نے کہا کہ مہنگائی و بیروزگاری کے موجودہ دور میں خواتین کو ہنر مند بنا کر اپنے پائوں پر کھڑا ہونے کے قابل بنانا وقت کی ضرورت ہے، اس حوالہ سے پاکستان بیت المال کے ویمن ایمپاورمنٹ سنٹرز اہم کردار ادا کر رہے ہیں جن کی جتنی تعریف کی جائے کم ہے، خواتین کو بھی چاہئے کہ وہ اس موقع سے بھرپور فائدہ اٹھائیں اور سلائی، کڑھائی اور کمپیوٹر کے کورسز مکمل کرنے کے بعد اس ہنر سے نہ صرف خود استفادہ کر کے اپنے خاندان کی کفالت کریں بلکہ اپنے علاقہ کی دیگر خواتین کو بھی ہنر مند بنائیں تا کہ خواتین کی زندگیوں میں تبدیلی لائی جا سکے اور معاشرہ سے غربت اور بیروزگاری کا خاتمہ ہو اور خواتین مردوں پر انحصار کرنے کے بجائے بااختیار زندگی بسر کرنے کے قابل ہو سکیں۔