ایکسپلورر سکول سسٹم کی پہلی سالانہ پری نرسری گریجویٹس کی تقریب تقسیم انعامات کا انعقاد،

اسلام آباد ۔ (اُردو پوائنٹ اخبارتازہ ترین - اے پی پی۔ 28 اپریل2018ء) ایکسپلورر سکول سسٹم کی پہلی سالانہ پری نرسری گریجویٹس کی تقریب تقسیم انعامات ہفتہ کو یہاں منعقعد ہوئی۔ سکول کے بچوں اور بچیوں نے انتہائی منفرد اور دیدہ زیب انداز میں اپنی نصابی اور غیر نصابی سرگرمیوں کا مظاہرہ پیش کر کے شرکاء کو حیرت زدہ کر دیا۔ سکول سسٹم کی ہیڈ مسٹریس شائستہ نعیم اور ڈائریکٹر سکول عاصم منیر نے شرکاء سے خطاب کرتے ہوئے کہا کہ ایک برس قبل جس سکول کی بنیاد رکھی تھی اس نے آج پھل پھول دینا شروع کر دیئے ہیں۔

انہوں نے کہا کہ ہمارا نصب العین قوم کے مستقبل کو اعلیٰ تعلیم، اعلیٰ انسانی اوصاف اور معاشرتی اقدار سے آراستہ کرنا ہے۔ ایک سال کے شاندار نتائج نے ہمارے عزم و حوصلے کو مزید تقویت دی ہے اور بہت جلد سکول سسٹم کے دائرہ کار کو بتدریج وسعت دی جائے گی۔

(جاری ہے)

انہوں نے نصابی اور غیر نصابی شعبوں میں نمایاں کارکردگی دکھانے والے طلباء طالبات اور اساتذہ کو ایوارڈ اور اسناد تقسیم کیں۔

دریں اثناء سکول سسٹم کو بہتر سے بہتر بنانے اور سوشل میڈیا کے ذریعے رہنمائی کرنے والے بچوں کے والدین کو بھی تعارفی اسناد پیش کی گئیں۔ تقریب کے دوران بچوں نے دلکش انداز میں ٹیبلو پیش کئے اور اپنی صلاحیتوں کا بھرپور اظہار کیا۔ شرکاء نے بہترین پرفارمنس پر طلباء و طالبات اور اساتذہ کی محنت کی خوب تعریف کی۔ ہیڈ مسٹریس نے ’’اے پی پی‘‘ کو بتایا کہ پہلے مرحلہ میں پری نرسری سے درجہ دوم تک کا آغاز کیا گیا تھا اور اب نئی کلاسز اور کمپیسز کا اجراء کرنے جا رہے ہیں اور معاشرتی اقدار سے روشناس طلباء کی تیاری میں یہ سکول سسٹم اپنا کردار ادا کرنے کی جانب آگے بڑھے گا۔