ہاشم آملہ قومی ایوارڈ حاصل کرنے والے پہلے جنوبی افریقن بلے باز بن گئے

اتوار 29 اپریل 2018 18:40

جوہانسبرگ (اُردو پوائنٹ اخبارتازہ ترین - این این آئی۔ 29 اپریل2018ء) مایہ ناز بلے باز ہاشم آملہ کو جنوبی افریقن حکومت کی جانب سے شاندار کارکردگی پر ’’آرڈر آف ایکامانگا‘‘ ایوارڈ سے نوازا گیا ہے۔ جنوبی افریقہ کے مسلمان کرکٹر ہاشم آملہ کو کرکٹ میں شاندار کارکردگی پر جنوبی افریقی حکومت کی جانب سے قومی ایوارڈ سے نوازا گیا وہ ’’آرڈر آف ایکامانگا‘‘ ایوارڈ وصول کرنے والے پہلے پروٹیز بیٹسمین ہیں، اس سے قبل فاسٹ بولرز شان پولاک اور مکھایا نتینی کو بھی یہ ایوارڈ دیا جا چکا ہے۔

یہ ایوارڈ جنوبی افریقہ کے بڑے قومی ایوارڈ میں سے ایک ہے جو آرٹس، کلچر، ادب، موسیقی، صحافت اور اسپورٹس میں شاندار کارکردگی اور خدمات پر دیا جاتا ہے۔ آملہ نے جنوبی افریقہ کی طرف سے 117 ٹیسٹ، 164 ون ڈے اور 43 ٹی ٹوئنٹی انٹرنیشنلز کھیلے ہیں اور مجموعی طور پر 17794 رنز سکور کیے ہیں، وہ ٹیسٹ کرکٹ میں جنوبی افریقہ کی طرف سے ٹرپل سنچری بنانے والے واحد بیٹسمین بھی ہیں، انہوں نے انگلینڈ کے خلاف اوول میں 311 رنز کی ناقابل شکست اننگز کھیلی تھی۔

(جاری ہے)

واضح رہے کہ انگلینڈ میں ہیمپشائر کی جانب سے کا?نٹی کرکٹ کھیلنے میں مصروف ہاشم آملہ نے ایوارڈ لسٹ میں اپنا نام شامل ہونے پر خوشی کا اظہار کرتے ہوئے ایوارڈ کو جنوبی افریقی عوام کے نام کیا تھا۔