مقبوضہ کشمیر : کل جماعتی حریت کانفرنس کی آزادی پسند کارکنوں کی جھوٹے مقدمات میں گرفتار ی کی مذمت

اتوار 29 اپریل 2018 19:20

سرینگر(اُردو پوائنٹ اخبارتازہ ترین - آن لائن۔ 29 اپریل2018ء) مقبوضہ کشمیر میںکل جماعتی حریت کانفرنس نے بھارتی پولیس کی طرف سے آزادی پسند کارکنوں کی جھوٹے اور بے بنیاد مقدمات میں گرفتاری کی شدید مذمت کی ہے۔ میڈیا رپورٹس کے مطابق کل جماعتی حریت کانفرنس کے ترجما ن نے سرینگر میں جاری ایک بیان میں کہا کہ بھارتی پولیس نے ضلع اسلام آباد میں بڑے پیمانے پر حریت کارکنوں اور عام کشمیری نوجوانوں کی گرفتاری کا سلسلہ شروع کر رکھا ہے ۔

انہوںنے کہا کہ حال ہی میں عاشق حسین ناچور نامی ایک حریت کارکن اور دو عام نوجوانوں عاصف احمد اور اشفاق احمد کو گرفتار کیا گیا ۔ انہوںنے کہا کہ بھارتی پولیس نے بے گناہ نوجوانو ں کو گرفتار کر کے انہیں سیاسی انتقام کا نشانہ بنانا اپنا وطیرہ بنا لیا ہے۔

(جاری ہے)

ترجمان نے کہا کہ بے گناہ نوجوانوں کو گرفتار کر کے تھانوں، جیلوں اور تفتیشی مراکز میں پہنچانے کا ایک اور مقصد ترقیوں اور تمغوں کا حصول ہوتا ہے ۔

انہوںنے پولیس کی ظالمانہ کارروائیوں کی شدید مذمت کرتے ہوئے کہا کہ بھارت مقبوضہ کشمیر میں انسانی حقوق کی دھجیاں بکھیر رہا ہے۔ ترجمان نے بھارتی پنجاب سے دو کشمیری طلباء شاہد ملہ اورعادل حسین تیلی کی جھوٹے مقدمات میں گرفتاری کی بھی شدید مذمت کرتے ہوئے کہا کہ اس ناروا کارروائی کا مقصد طلباء کے مستقبل کو تاریک بنایا ہے۔