پرائیوٹ ٹور آپریٹرز کی میرٹ لسٹ کو حتمی شکل دینے میں مزید ایک ہفتہ لگ سکتا ہے، وزارت مذہبی امور

پیر 30 اپریل 2018 12:05

اسلام آباد ۔ (اُردو پوائنٹ اخبارتازہ ترین - اے پی پی۔ 30 اپریل2018ء) وزارت مذہبی امور پرائیوٹ ٹور آپریٹرز کی میرٹ لسٹ کو تاحال حتمی شکل نہیں دے سکی۔ وزارت مذہبی امور کے ذرائع کا کہنا ہے کہ میرٹ لسٹ کو حتمی شکل دینے میں مزید ایک ہفتہ لگ جائے گا۔ ذرائع نے پیر کو اے پی پی سے بات کرتے ہوئے کہا کہ وزارت مذہبی امور نے تمام پرانے اور نئے حج ٹور آپریٹرز کو اپنی اعتراضات جمع کرانے کے لئے 28 اپریل تک کا وقت دیا تھا ۔

(جاری ہے)

قبل ازیں تمام ٹور آپریٹرز سے بذریعہ اشتہار کہا گیا تھا کہ وہ اپنی مصدقہ دستاویزات بمعہ آڈٹ رپورٹس وزارت مذہبی میں جمع کرا دیں تاہم متعدد کمپنیوں کو اس پر تحفظات تھے جس پر وزارت مذہبی امور نے تمام کمپنیوں کو 28 اپریل تک اعتراضات جمع کرانے کے لئے وقت دیا تھا۔ ذرائع کا کہنا ہے کہ 12سے 13 سو کمپنیوں نے اعتراضات جمع کرائے ہیں جن کی روزانہ کی بنیاد پر ایڈیشنل سیکرٹری کیپٹن آفتاب احمد خان کی سربراہی میں قائم کمیٹی سماعت کررہی ہے۔ ذرائع نے توقع ظاہر کی ہے کہ پرائیویٹ ٹور آپریٹرز کی میرٹ لسٹ کو حتمی شکل دینے میں مزید ایک ہفتہ لگ جائے گا جس کے بعد فہرست وزارت کی ویب سائٹ پر آویزاں کردی جائے گی۔